1370, 15 octobre. — Moulins.

Loÿs, duc de Bourbon, conte de Clermont, per et chamberier de France, a touz ceux qui ces presentes lettre, salut. Savoir faisons a touz, presens et avenir, que, en consideracion es bons et grans services que nous ha faiz et fait de jour en jour et esperons que nous face au temps a venir nostre amé et feal chevalier et conseilher messire Jehan le bastart de Bourbon, seigneur de Rocheffort¹, a ycelui messire Jehan, de nostre certaine science, pure, franche et parffecte volunté en cure de pure et parfaicte donacion faicte sollemnement entre les vis, en la melleur, plus proffitable et valable manere que donacion puet et doyt mieux et plus profitablement valoir tant de droyt comme de costume de païs, senz esperence de jamés la revoquer ne venir encontre par nous ne par noz successeurs aient cause de nous audit messire Jehan et es siens qui perpetuelment de lui porront et devront avoir cause, avons donné et octroyé et pour ces presentes donnons et octroyons nostre mayson que nous avons en nostre ville de Molins assise devant nostre chastel dudit lieu avec la grange et toutes autres appartenences qui povent appartenir a ladicte maison quelconques, laquelle fu ci en arrers a feu Paule Giraut. Et laquelle ledit messire Jehan avoit ja pieça acquise de Marion, filhe fu dudit Paule Giraut, et depuis l'avons acquise doudit messire Jehan, et avec ce et en acroyssement de ladicte donacion a icelui messire Jehan avons donné et donnons la place de la tour avecques les appartenances d'icelle, la pierre et autres choses estant en ycelle place, laquelle nagueres nous avons acquise dou seigneur de Breçolles et laquelle est joignant a ladicte maison d'une part, et a la maison Pierre Desmer d'autre part, et a la mayson Guart Villaignes et Martin le Costeller d'autre part. Et lesquielx maison, grange et place de tour, la pierre estant en ycelle, avec touz leurs autres droyz et appartenances quelconques, par nous ainssi donnees audit messire Jehan et au siens qui de lui auront cause par le temps a venir perpetuelment. Nous promectons en bonne foy audit messire Jehan garentir et deffendre perpetuament comme dit est senz ce que contre la donacion dessus dicte par nous ne noz successeurs aient causes de nous fort allé en contrayre en aucun maniere. Et desdictes choses audit messire Jehan avons baillé et balhons par ces presentes la possession reaulment et de soit, et voulons et nous plaist que d'iceux il use et joïse tout ainsi comme nous faisions par avant ladicte donacion. Donné en nostre ville de Molins, soubz nostre seel, le XV^e jour d'octobre, l'an mil CCC sexante et diz.

(Sur le repli, à gauche :) Par monseigneur le duc.