1370, 10 juin. — Montbrison.

Loÿs, duc de Borbonnoys, conte de Clermont, per et chembarier de France, curateur de nostre tres chier et amé cousin le conte de Foroys, a touz ceux qui verront ces presentes lettres, salut. Savoir faisons que nous, confianz a plain du sens, loaulté et bonne diligence de nostre amé conseiller Jehan Frenier¹, clerc de monseigneur le roy, ycellui avons fait, establi et ordené, faisons, establissons et ordenons capitaine et chastelain de Lavieu², c'est assavoir ladicte chatellenie aus gaiges, profiz et autres esmolumenz acoustumez, et ladicte capitenarie aus gaiges de sexante florins par an avecques les autres profiz acoustumez a prandre, savoir lesdis sexante flourins sur les habitans de la chastallenie, mandement dudit lieu de Lavieu, auquel Johan Frenier, capitain et chastelain dessus dit nous avons donné et donnons plain pover de fere et exercer lesdiz offices et toutes autres choses a yceulx appartenans. Mandons et commendons a touz nous subgetz et de nostredit cousin, requerens toux autres que audit capitain et chastelain en faisant et excercent lesdiz offices obeïssent et diligement entendent. Et donnons en mandament au tresourier de Foyrois ou a cellui a qui il apartient que del gaiges de ladicte chastelanie il le poie ou asigne chacun an, et par rapourter ces presentes avecques quittance de lui lesdiz gaiges lui seront alohés en ses comptes et desduit de sa recepta. Donné a Montbrison, soubz notre seel, le X^e jort de juign, l'an mil III^C sexante et dix.