1369, 7 juillet. — Bourbon-l'Archambault.

Loÿs, duc de Bourbonnois, conte de Clermont, per et chambarier de France, a touz ceux qui orront et verront ces presentes lettres, salut. Savoir faisons a touz, presans et advenir, que comme nostre amé et feal chevalier, messire Jehan bastart de Bourbon, sire de Roucheffort¹, ou contrau du mariage de lui et de dame Agnes Chalhou, sa fame, ont dohee ladicte dame Agnes du chastel et lieu de Roucheffort² et de la moyté des terres et justices dudit lieu de Roucheffort, d'Ebreulle³ et de Bellanave⁴, si comme plus a plain est contenu es lettres du contrau dudit mariage ; et pour ce que ou cas que il adviendroit que nostredit chevalier yroit de vie a trespassement sans hoirs descendans de son corps, lesdictes terres nous escherroient et appartiendroient ou a ceux qui porroient avoir cause de nous, pour ce que noz predecesseurz et par nous les chouses dessus dictes audit chevalier ont esté donnees et es hoirs descendans de son corps de droite ligne, si deubte que ou temps advenir empeschement fut mis ou dohere de ladicte dame Agnes, sa fame, ou cas que le cas adviendroit qu'il morut sanz hoirs de son corps, si nous a humblement suplié et requis que sur ce il nous pleust pourvoir a ladicte dame Agnes, sa fame, de gracieux remide. Pourquoi nous, considerans les bons et grans services que ledit nostre chevalier nous a faiz et fait de jour en jour, voulans incliner a sa supplicaciom et ladicte dame Agnes assehurer de son dohere le contrau dudit mariage dont [a]^a nous a fecte pleniere foy, de nostre certaine science et bien advisé propoux, voulons, octroions, ratiffions et affermons sur l'assiette et constituciom dudit dohaire, et que ladicte dame Agnes aie et joÿsse de sondit dohere emprés le deceps dudit nostre chevalier, son mari, et soit et demeure dohee par le cours de sa vie sur ledit chastel et sur lesdictes terres et justices en la forme et maniere que par nostredit chevalier, son mari, il a esté constitui, promis et acordé et que contenu est esdictes lettres dudit mariage, lequel dohere nous voulons et prometons pour nous, pour noz hoirs et ceux qui de nous ont et auront cause, baller, asseoir et delivrer plainement sanz contredit et empeschement a ladicte dame Agnes incontinent et sanz delay si le cas dessus dit escheoit et advient ; et voulons que lors ladicte dame Agnes puisse prandre et occuper de li meismes sanz nous ou noz genz attendre ne apeller la detempciom dudit chastel et user, joïr, prandre et exploiter la moyté des yssues, proffis, rantes et esmolumens desdictes terres et justices par nondevis jusques a ce que par nous ou pour noz genz partage, division et assiete li soit fecte de sondit dohere ; et prometons en bonne foy cest present octroy avoir ferme et agreable sanz jamais venir a l'encontre par nous ne par les nostres, et quant a ce tenir oblighons nous et les nostres et ceux qui de nous porront avoir cause et touz noz biens presens et advenir. Si donnons en mandement a nostre baillif et a noz clers de Bourbonnois et a touz noz autres justiciers et officiers qui a present sont et qui par le temps avenir seront et a chascun pour soy si comme a lui apartiendra que ladicte dame Agnes soffrent et facent joïr et user de nostre presente confermaciom et octroy et dudit dohere et de tout le contenu esdictes lettres et chascun d'icellez quant le cas escherra sanz venir au contraire en aucune maniere. En tesmoing des chouses dessus dictes, nous avons fet mectre nostre seel en ces presentes lettres, lesquelles furent fectes et donneez en nostre chastel de Bourbon, le VII^e jour du moys de jullet, l'an de grace mil trois cens soixante et neuf.

Par monseigneur leduc, present monseigneur le chancelier⁵.