1368, 30 août.

Loÿs, duc de Bourbonnoys, conte de Clermont, per et chambarier de France. Faisons savoir a touz qui cez lettres verront que nous, pour et ou non de notre tres chier et amé cousin le conte de Fourez, faisons et establissons vallet dudit conte et de son consierge a Monbrison Mathé Salley de Monbrison en tielle maniere que ycellui vallet doye prendre garde de faire labourer le clous quant il venra que de faire sera, et les vendanges, les vins et les autres ouvres appartenans a son office. Et pour faire lesdictes chouses, li donnons oultre ses journees qu'il prendra quant il laborera ou fera autres ouvres, si comme prendront les autres ouvriers de son mestier qui se loyent en la place, par son salaire sissante solz tornois par sa chaussanniere, trois alnes de burel par sa robe et deux sestiers de segle par sa meysson chescune annee, laquelle pension nous voulons et mandons au tresorier dudit conte qui est et qui sera qu'il li paye chescun an tant comme il fera ledit office sans en attendre autre mandement. Donné souz nostre seel, le penultime jour d'aoust, l'an de grace mil CCC sissante et huit.