1366, décembre.

Loÿs, duc de Bourbonois, comte de Clermont, per et chambarer de France, a touz ceux qui verront ces presentes lettres, salut. Savoir faisons a touz presenz et avenir que, de la partie messire Goussaut, chevalier, segneur de Thory¹, nous a esté humblement exposé que come par notre procureur il eust esté aprochez devant notre ballif et autres noz justicier et officiers sur ce que notredit procureur mantenoit et proposoit contre luy que, non obstant certain plait pendens par devant notredit ballif entre Regnaut de la Monte de Mazeres², escuyer, d'une part, et Margarite de Chenillac a l'autorité de Hugues de Bosquotoraul, son mari, escuyer, d'autre part, et a cause de l'ostel de Pacenac, rantes et appartenances d'icelluy, desquieux mariez ledit chevalier portoit favorablement la partie pour et en haine dudit plait et pour contraindre ledit Regnaut a venir a composicion et adcort sur les chouses dont ledit plait et procex estoit, ledit chevalier, par plusieurs ses complices, c'est assavoer par Hugues de Champrobert, Pierre Troussebois, Arpin Doregna et Tevenin Ta[n]art, un certain jour entour la Chandeleur darrerement passee que ledit Regnaut venoit de Souvegny³ de une jornee que il li avoit en celle journee, auxquelx lesdiz mariez et soy aloit a Molins, fist de agoir^a et f[ai]t apenssé prandre ledit Regnaut de la Monte et le fist mener en son chastel de Thory⁴, et la fust detenuz longuement prisonniers en s[e]s prison fermé et es fers et tant que il convenit que ledit Regnaut adcordast avecques lesdiz mariez, pour lesquelles chouses notredit procureur faisoit plusieurs et diversses conclusions contre ledit chevalier et contre les dessus diz ses complices, et ledit chevalier, pour luy et pour sesdiz complices, lesquieux il adveoit dudit fait en tant comme son advuehu leur povoit valoir, disent que ce il avoit fait pour ce que il savoit certainement que ledit Regnaut avoit tres grant tort envers lesdiz mariez et que il estoit un grant pledeur et que par voe de plait lesdiz mariez ne povoient a[voir] brievement leur droit de luy, ne venir a leur entancion, et que se en aucune manere en ce il avoit mespris ne sesdiz complices il en esteroit en notre bonne ordenance et volenté. Et pour ce depuis ledit chevalier, avecques plusieurs ses amis, doubtenz en ce rigueur de justice, s'est traiz par devers nous et en nous supplient humblement que sur ce nous li voulssissons estre gracieux et misericors en soy, mectent du tout dudit fait en notredite volenté et ordenance. Pour quoy nous, consideranz les granz services que ledit chevalier nous a faiz par lont temps et fait de jour en jour et esperons que il nous face ou temps avenir, et aussic la grant desplesir que il a dudit fait avoir fait faire et perpetuer, volenz en ce plux benignement que rigureusement proceder, audit chevalier et es dessus diz nomez ses complices en cas dessus dit, tout ycelluy fait avecques les circonstances et despendences d'icelluy avons remis, quicté et pardonné et par ces presentes remectons, quictons et pardonnons avequelx toute poine criminelle, corporelle ou civille que pour ceste cause il pouroient avoir commise et entendue envers nous, sauf le droit de partie a poursigre civillement se il li plait. Et voulons que touz leur biens qui pour ceste cause auront esté pris ou aresté leur soient mis du tout au delivré, lesquieux par ces presentes nous leur mettons a pure et plainne delivrance en imposant sur ce a touz noz procureurs et officiers perpetuel silence. Si donnons en mandement par ces presentes a notre baillif de Bourbonois, a touz refformateurs, procureurs et a touz noz autres justiciers et officiers qui sont a present et pour le temps advenir seront, ledit chevalier et sesdiz complices il lessent et facent joïr et user de notre presente grace et remission senz les molester pour ce doresenavent en corps ne en biens. Et pour ce que ce soit perpetuelement ferme et estable, nous avons mis et seellees ces lettres de notre seel, ou mois de decembre, l'an de grace mil trois cenz sexante six.

(Repli :) Par monseigneur le duc, present son chancelier⁵ et Bichat de Chauvigny⁶ son chambellan.