1366, novembre. — Moulins.

Loÿs, duc de Bourbonnois, conte de Clermont, per et chamberier de France, a tous ceulx qui ces lettres verront, salut. Savoir faisons a tous presens et advenir que nous avons veues noz autres lettres seellees en las de soye et cire vers desquelles la teneur s'ensuit :

[Suit la copie de l'acte de Louis II daté de février 1364 (n. st.) (cf. acte à cette date) par lequel il accepte les 49 livres de rente annuelle que Philippe de Chauvigny¹ lui abandonne, à hauteur de 39 l. sur les fours, laydes et rentes qu'il lève dans la ville de Villebret, et à hauteur de 10 l. sur le grand péage de Moulins]

Et pour ce que lesdictes lettres et les choses contenues en icelles furent faictes nous estant hostage en Engleterre, aprés ce que nous fusmes retorner dudit hostage en nostre païs de Bourbonnois, nous avons voulu savoir comme ladicte assiette avoit esté faicte et se la recompensacion dont mencion est faicte esdictes lettres nous estoit prouffitable, si en avons fait enquete dilligente et avons fait venir les commissaires nommés esdictes lettres qui firent ladicte assiette et prisié de terre en nostre presence et de tout nostre conseil et les avons sur ce fait enquerir et examiner dilligement, et finablement ilz nous ont rapporté par leurs loyaultés et seremens ladicte assiette avoir esté faicte bien et deuement en la forme et maniere qu'il est contenu esdictes lettres et que ladicte recompensacion et eschange nous est tres grandement prouffitable, pour quoy nous, en sur ce grant et meure deliberacion a tout nostre conseil, de nostre certaine science et bien advisé propoux, lesdictes lettres et tout le contenu d'icelles avons louees, ractiffiees et approuvees et par la teneur de ces presentes louons, ractiffions et approuvons, et ledit eschange et recompensacion avons ferme et agreable et voulons que les choses qui par nous ont esté baillees audit Phelippe, nostre chambellan, et dont il nous a fait ladicte recompensacion soient et demorent perpetuelment a lui et a ses hoirs et qui […]^a de lui auront cause comme leur propre heritaige sans ce que jamaiz nous ne noz successeurs puissent venir a l'encontre en aucune maniere, et quant aux choses contenues esdictes lettres perpetuelement avoir et tenir fermes et agreables et les choses qui par nous lui ont esté baillees comme perpetuelment garentir a soy et a ses hoirs et que de lui auront cause nous obligons nous, noz hoirs et tous noz biens presens et advenir et ceulx de noz hoirs, et promectons de non venir et fere venir encontre le contenu desdictes lettres ne fere ou fere faire choses ores ne ou temps advenir, pour quoy nostredit chambellan et ses hoirs ou aians cause de lui ne aient ne tiegnent comme leur propre heritaige les choses qui par nous luy ont esté baillees selon le contenu desdictes lettres. Et pour que ces choses soient perpetuelement fermes et estables, nous avons fait mectre nostre grant seel a ces presentes qui furent faictes et donnees en nostre ville de Molins, ou moys de novembre, l'an de grace mil III^C soixante six.

Par monseigneur le duc en son grant conseil ouquel estoient messire Phelibert de Lespinasse, seigneur de la Cloist^b2, le chancellier³, le baillif de Bourbonnois, messire Pierre Galebrun⁴, Simon Berthines, nostre clerc general de Bourbonnois⁵.