1365, 8 août. — Moulins.

Transcription d'après A.

Nous Loÿs, duc de Bourbonnois, conte de Clermont, per et chambrier de France. Savoir faisons a touz que comme nous et nostre païs de Bourbonnois fussiens tenus a messire Bertran, bastart de Lebret^a, seigneur de Malemort et de Brive, en plusieurs grandes et diverses sommes de florins pour les rachapz des fors de Changi, de la Roche au Tahon, de Villiers et de plusieurs autres fors que les ennemis du royaume de France ont longuement tenus et occupez en nostredit païs, et pour deniers que l'en li a donnez et ordenez a panre sur nous et nostredit païs pour ses missions, frais et despens qu'il a faiz en plusieurs voyages venent devers noz genz querie son debte, comme par plusieurs autres et diverses causes dont plusieurs tractiez, accors, comptes finaux, lectres obligatoires et lectres de quictances de nous, de monseigneur Jehan Griveaul, nostre bailli de Bourbonnois¹, et de Jehan Griveaul, son filz, pour et ou nom de nous, et dudit messire Bertran et autres de ses compaignons et de ceulx de sa part pour et ou nom de lui, ont esté faictes tant d'une partie comme d'autre, sachent tuit que aujourd'uy ledit messire Bertran s'est traiz en nostre ville de Molins par devers nostre amé et feal chevalier messire Jehan, bastart de Bourbon, gouverneur de nostredit païs² et l'a sommé et requis de faire un final compte et accort des choses dessus dictes, liquelx, en la presence de noz amez et feals chevaliers les seigneurs de Norry³ et de Thori⁴ et dudit nostre bailli de Borbonnois, a receu ledit messire Bertran a compte, et veu touz les tractiez, acors finaux, comptes, obligacions et quictances devant dictes, tant de nous comme de lui, par lequel nous et nostre païs de Bourbonnois sommes demorez en debte devers ledit messire Bertran, toutes choses que nous, noz genz et nostredit païs eusmes oncques a faire a lui ne a ses complices et compaignons pour les causes dessus dictes ne pour quelxconques autres causes que ce soit comptees et rabatu touz les paiemens qui pour et ou nom de nous et de nostredit païs li ont esté faiz en la somme de deux mille six cens quarante huit florins f.^b et dimi, lesquelx nous, en bonne foy, pour nous et nostredit païs, promectons rendre et poier ou fere rendre et poier audit messire Bertran ou a ses heritiers ou ayans cause porteurs de ces lectres aus termes et par la maniere qui s'ensuivent : c'est assavoir a Noel prochain venant, CXLVIII florins et dimi, a Quaresme entrant aprés ensuivant, V^C florins, a la Toussains prochaine ensuivant qui sera en l'an mil CCC LXVI, mil florins, et au terme de l'autre Toussains ensuivant qui sera l'an LXVII, les autres mil florins, et parmi cest final compte toutes les lectres des tractiez, accors finals, comptes, obligacions, quictances, convenances et foys baillees d'une partie et d'autre sont chancellees, cassees, anullees, irritees^c5, quaciees et pardonnees sanz ce que il se puisse, les siens ou aians cause de lui jamays aidier par les causes dessus dictes et fere demande a nous ne a nostredit païs d'aucunes lectres obligatoires se il les trouvoit, ne nous aussi ne nous pourrions aidier de ses lectres de quictance se nous les trovions, outre celles qui sont mises et comptees en cest present compte ; et n'est pas a oblier que en la somme de cest present restat sont compté et mis la somme de cincq cens florins que le signeur de Lebret^d et les exequteurs de fu messire Arnaut de Lebret^e, pour et ou nom de ladicte exequcion et des heritiers dudit messire Arnaut, ont volu et accordé d'autre^f avecques nostredit gouverneur estre deduit et rabatu sur nous et nostredit païs de la somme de III^M florins que nous et nostredit païs estions tenu audit fu messire Arnaut pour sa part de l'achapt dudit lieu de Villiers pour les rendre et poier audit messire Bertran, et ledit messire Bertran a pris en main et s'en est fait fort de nous en acquicter et nostredit païs devers lesdiz exequteurs et heritiers ; et outre les choses pour plusieurs despens que lidiz messire Bertrans a traiz pour le sire du Deffens que nous meismes hostage pour nous et nostredit païs devers messire Aymenion de Lebret^g, nozdictes gens et conseil ont accordé avecques lui a une ceinture d'argent doree laquelle il li ont baillee et poiee le jour de cest compte ; et par ainsi lesdiz paiemens acompliz par la maniere et aus termes que dessus est dit, nous, noz genz et tout nostredit païs demorons quictes envers ledit messire Bertran, ses hoirs et aians cause de lui de toutes les choses dessus dictes et de toutes autres choses que nous et nostredit païs eusmes oncques a fere a lui par quelxconques causes que ce soit ou peust estre doresenavant et a touzjourz, et aussi de toutes ces choses le quictons, absolons et pardonnons. En tesmoing et confirmacion des choses dessus dictes, nous avons fait mectre nostre seel a ces presentes faictes et donnees a Molins par nostredit gouverneur et conseil le venredi VIII^e jour d'aoust, l'an de grace mil CCC soixante et cincq ; et nous Bertran, bastart de Lebret^h, sire de Malemort et de Brive dessus dit, tout l'accort, tractié et compte finable et toutes autres choses contenues en ces presentes par la maniere que dessus est dit et devisié nous louons, greons, ratiffions et approvons et promectons loyaument et sur nostre foy a le tenir, garder et acomplir et a le fere tenir, garder et acomplir pour nous, noz hoirs, compaignons et bien veullens en touz ses poins sanz jamais venir ou fere venir encontre. En tesmoing de ce, nous avons mis nostre seel a ces presentes, l'an et jour dessus diz.

(Sur le repli à gauche :) Par le conseil monseigneur le duc ouquel estoient monseigneur le gouverneur et messeigneurs dessus dis.