1361, août. — Moulins.

Loÿs, duc de Bourbonnois, conte de Clermont et chambarier de France. Savoir faisons a touz presenz et avenir que, de la partie des amis charnelx de Jehan Boutefeu et de Hugues Boutefeu, son cousin, nous a esté signiffier et monstré que ja pieça Perrin Boutefeu, freres dudit Hugues et cousin dudit Jehan, liquelx estoit par le temps et ancor est garde de nostre forest de Baignoloys², trova Guillaume et Jehan, enfans Regnier Terriat, avec plusieurs leur complices chaçent avec filez ou boysson dou Bornat avec grant quantité de chiens, lequel boysson est de la garde de nostredicte fourest de Baignolois, et pour ce ledit Perrin, comme garde d'icelle, vousist prendre lesdiz filez, et lors ledit Guillaume, mehuz de male volenté, resconfist audit Perrin lesdiz filez et, en oultre, le feri et bati d'un baston en fesent sondit office, si et par telle maniere qu'il en fust malades au lit longuement. Et pour ce, lesdiz freres furent appellé par devant le mestre de noz fourez de Bourbonnois par plusieurs foez ou il firent plusieurs deffauz, pour lesquelx deffauz il fu comandé et commis dudit maistre de nos fourez a Jannet de Ginestines, garde avec ledit Perrin de nostredicte fourest, et plusieurs autres de prendre les corps desdiz Guillaume et Jehan Terriat quelque part que il fussent trouvé ors de lieu saint avec touz leur biens. Et aprés ce, lesdiz Hugues et Perrin Boutefeu, freres, et ledit Jehan Boutefeu, leur cousin, venirent par devers nous et nostre conseil, et nous requirent et supplierent que lesdiz Guillaume et Jehan Terriat feissons pugnir de ladicte malefaçon selon le cas. Pour quoy il fut comandé en nostre conseil a nostre bailli de Bourbonnois que yceulx freres fussent pris et touz leur biens et que raison en fust faicte selon le cas, liquelx nostres baillis donna commission a un^a de nos sergenz et fist crier solempnement que quicunques pourroit trouver lesdiz Guillaume et Jehan Terriat que il les prissent et missent en noz prissons. Et pour ce que lesdiz Hugues et Perrins Boutefeux, freres, et ledit Jehan Boutefeu, leur cousin, veyrent que lesdiz Guillaume et Jehan Terriat ne vouloient venir au droit de nostre cort, et aussi pour ce que^b lesdiz freres et plusieurs leur complices avoient donnees et faictes plusieurs menaces es familiers et genz desdiz Hugues et Perrin Boutefeu et de leurdit cousin de eux meffaire en corps et en biens, il ne leur familier et genz n'oserent des lors demorer ne converser en leur hostieulx, ains des lors se garderent desdiz Guillaume et Jehan Terriat et de leur complices affin que il ne leur meffeissent, et des lors se tenirent pour deffiez tant par lesdictes menaces comme pour ce que il avoient dit et s'estoient venté par plusieurs foez, en la presence de plusieurs des voysins desdiz Hugues et Perrin Boutefeu et dudit Jehan, leur cousin, de eulx meffaire en corps et en biens, si comme dit est. Si chevaugerent lesdiz Guillaume et Jehan Terriat, freres, en Bourgoigne et en Nivernois et en plusieurs autres lieux pour eux prendre mes il ne les pehurent trouver, et sur ce, lesdiz Guillaume et Jehan Terriat, freres, avec plusieurs gens d'armes forpaïsez, leur complices, venirent es hostieulx desdiz Hugues et Perrin Boutefeu et dudit Jehan, leur cousin, et rompirent leurs arches et firent plusieurs autres griex, exceps et maleffaçons, et les beux, vaches et autres bestes desdiz Hugues et Jehan Boutefeu tuerent, et leur argent et plusieurs lettres, qui dedans leurs arches estoient, prirent et emporterent, et leur feyrent plusieurs autres grans et enormes dommages. Et quant lesdiz Hugues et Perrin Boutefeu et Jehan, leur cousin, veirent que il furent aussi domagié par lesdiz Guillaume et Jehan Terriat, freres, il assemblerent de leur amis et autres leur aidenz et complices et chevaucherent lesdiz Guillaume et Jehan Terriat tant et si longuement que il les trouverent a Bourbon Lensseys³, et Regnier Terriat leur pere avecques eux, et la il proyrent lesdiz Regnier Terriat et Jehan, son fil, et ledit Guillaume s'enfuy, et yceulx Regnier et Jehan emmenerent et tenirent longuement pris pour ce que forfait leur avoyent. Et aprés ce, lesdiz Hugues et Jehan Boutefeu, par eux et par ledit Perrin Boutefeu^c, frere dudit Hugues, d'une part, et ledit Regnier Terriat et Jehan, son fil, d'autre part, du consentement et volunté des amis d'une partie et d'autre tracterent et acorderent que lesdiz Regnier et Jehan, par eux et par ledit Guillaume par lequel il preyrent en main, payeroient et rendroient esdiz Hugues, Perrin et Jehan Boutefeu, cent escus d'or de Jehan et leur rendroient leurdictes lettres en emendemens des forfaiz que il leur avoient faiz, et de ce tenir et faire tenir audit Guillaume, il jurerent es sains Euvangiles et baillerent leur foy de ce acomplir et venir a certaine journee a ce ordonnee des amis, et a ce se obligerent ; a laquelle journee ledit Regnier Terriat vint et sesdiz enfans ne venirent point, et par ainssi mantis ledit Jehan sa foy. Et a ycelle fois de rechief jura, donna sa foy et se obliga ledit Regnier Terriat de tenir ledit acort et faire tenir a sesdiz enfanz, et de poier lesdiz cent escuz d'or esdiz freres et Jehan Boutefeu, leur cousin, par les dommages que fait leur avoient a une autre certaine journee que acordee fust ; a laquelle journee ledit Regnier ne ses enffanz ne venirent ne ne contremandirent point en venent contre leur foy, serment, et mantent sadicte foy. Et cependent ledit Guillaume Terriat vint ches ledit Perrin Boutefeu et prist et embla un sien chevaul, et ches ledit Hugues, son frere, un autre chevaul a certain jour ensuivant, et danz certain temps aprés il vint par nuit es prez dou prieur de Saint Libardin⁴, frere desdiz Hugues et Perrin Boutefeu, et li embla quatre beux, lesquelx chevaux et beux il emmena et converti a son proffit. Et en aconmualent mal a mal, ledit Guillaume Terriat, mehu de mauvays courage, se perforça en traïson en certain temps aprés toutes^d ces choses de prendre le fort de Saint Libardin, et fist marché a un homme appelé Pailhoux comme il li rendist ledit fort. Et pour ce que lediz Pailhous ne li pooit faire de soy, il parla a un prestre qui estoit audit prieur de Saint Libardin, appelé messire Macé, comme il li aydast a randre audit Guillaume Terriat ledit fort, et il li promist de faire donner cinquante florins et la moytié de la pille⁵ audit Guillaume Terriat. Et lors ledit messire Macé et ledit Pailhoux ordenerent de faire venir ledit Guillaume Terriat en l'ostel dudit Paillhous a certaine nuit, a laquelle furent ensemble oudit hostel de Pailhous ledit Guillaume et lesdiz messires Macé et Paillous, et furent acordees les choses dessus dictes ; et promit ledit Guillaume audit messire Macé par ces choses faire cinquante florins et la moytié de la pille, et ledit messire Macé promit de rendre et bailher ledit fort audit Guillaume une autre certaine nuit, a laquelle ledit Guillaume devoit venir en certain lieu et devoit amener certaine cantité de gens d'armes, et ordenna ledit Guillaume que, quant ledit messire Macés l'auroit mis ou fort, il feroit morir ledit prieur de Saint Libardin et Hugues Boutefeu, son frere, ou cas que il y seroit. Et lors lediz messire Macés pria audit Guillaume Terriat que ne voulsist fere morir Jehan Boutefeu se il y estoit quar il estoit trop tenuz a lui pour les biens que il li avoit faiz, et lidiz Guillaumes li promist que ne feroit il se il ne se metoit en deffensse. Et ces choses ainsi faictes, promises et acordees, il se departirent, et ledit messire Macé, comme bons et loyaulx françoys, en contenant que il fu departi dudit Guillaume Terriat, il fist savoir audit prieur de Saint Libardin et a Jehan Boutefeu, capitaine dudit lieu, toutes ces nouvelles affin que il y porvoyssent de remede. Et aprés toutes ces choses, avint un jour que ledit Jehan Boutefeu encontra ledit Guillaume Terriat et le prist et le mena oudit fort, et tantost anvoia querir ledit Pailloux, liquelx vint et il furent ensemble, li et ledit Guillaume Terriat, il cognehurent les choses dessus dictes ainssi estre faictes en la presence de plusieurs, et avec ce ledit Guillaume cognut les autres roberies et autres malefices par lui et par ledit Jehan, son frere, ainssi estre faictes comme dit est. Et ledit Paillous, par ledit fait du commandement dudit nostre bailli, fu menez en nos prisons a Molins, esquelles il morut. Et aprés ces choses avint que il fu fait savoir audit Jehan Boutefeu que lidiz Jehan Terriat, freres dudit Guillaume, devoit venir a un hostel appellé Burge pour espier lesdiz Jehan Boutefeu et Hugues, son cousin, pour eux domagier a son povhihr. Si avint que lidit Jehan Boutefeu vint audit lieu de Burge et yleques trouva ledit Terriat, et en contenant il li coru sus et lors lidit Jehan Terriat ne sot metre en deffense a lui, si le prist ledit Jehan Boutefeu et le mena a l'ostel qui fu a la mere dudit Jehan Terriat, et ilecques il se vost rendre audit Jehan Boutefeu et donner foy, mes il ne le vost prendre a merci pour ce que autrefoiz li avoit mentie sa foy, et mit la main a l'espee et copa audit Jehan Terriat le pié et le poing et le lessa en tel estat, pour lesquelx blecehures la mort s'en ensuy en la personne dudit Jehan Terriat. Et pour ce doubtent lesdiz Jehan et Hugues Boutefeu que, tant pour la guerre que il ont fait ensemble a leurdiz enemis comme pour la mort dudit Jehan Terriat, que aucuns dommages leur pehust a venir au temps avenir, si nous ont requis et humblement supplié leurdiz amis que sur ce leur veuillons pourveoir de nostre benigne grace. Pour quoy nous, mehu de pitié, heu deliberacion sur ce avec nostre grant conseil, et vehu et consideré que ce que lesdiz Hugues et Jehan Boutefeu ont fait en ceste partie, il ont fait assez raysonablement par tant que leurdiz ennemis avoyent esté a nos genz desobeïssant de venir ester a droit en nostre cort comme dessus est plainement desclaré, et avecques ce avoient plusieurs fois esdiz Jehan et Hugues Boutefeu et audit Perrin Boutefeu, frere dudit Hugues, et les avoient domagez en plusieurs manieres indehuement et a tort, et avecques ce continuement touz jourz en leur mauvaise volunté, si comme apert audit Guillaume Terriat qui vouloit prendre ledit fort de Saint Libardin pour traïson dont plus granz dommages peussoient estre a venir a tout nostre païs mesmement. Heu consideracion a ce que lesdiz Hugues et Jehan Boutefeu sont bonnes genz, et de honeste vie et conversacion, et de bonne fame et renommee et onques mais ne furent repris de avoir mauvais blasme, ains nous ont bien et loyaument servi ou temps passé es guerres de monseigneur le roy et en plusieurs autres manieres, de nostre certaine science, auctorité et pleniere poyssance dont nous usons en ceste partie, et de grace especial, esdiz Hugues Boutefeu et Jehan, son cousin, et a touz leurs aidens et complices qui sur ce leur ont aidé ou cas dessus dit, toute paine criminelle et civille que il pouroient avoir encoru envers nous pour la cause ou causes dessus dictes et despendences d'icelles leur avons quicté, remis et pardonné, et, par ces presentes, quictons, remectons et pardonnons et desdiz cas les avons absolz et absolons, et les avons remis et remectons a leur païs, a leur biens et a leur bonne fame et renommee un chascun pour soy si en aucune maniere elle estoit pour extirpee^e ; et touz banz, proces, informacions ou autres proclamacions quelconques, se aucunes en ont esté faictes contre les personnes desdiz Hugues Boutefeu et Jehan, son cousin, ou aucun de leur complices, avons mis et mectons au neant, en imposant sur ce a nos procureurs de nostredit duchié de Bourbonnois et a touz autres noz subgés perpetuel silence, sauve le droit de partie a poursuir civillement. Si donnons en mandement a nostre bailli de Bourbonnois et a touz nos autres justiciers, officiers et a leur lieutenans et a un chascun pour soy si comme a lui appartiendra que lesdiz Hugues Boutefeu et Jehan, son cousin, et touz leurdiz complices facent et soffrent joïr de nostre presente grace sanz eulx molester ne soffrir estre molestez aucunement au contraire. Et se aucuns de leur biens ont esté pris, empeschez, saisiz ou arrestez par la cause ou causes dessus dictes, si leur mectent ou facent mectre au delivré incontenant, quar ainssi le voulons estre fait. Et pour plus grant grace nous avons octroié et octroions esdiz Hugues Boutefeu et Jehan, son cousin, par eux et par leur complices, que il puissent faire presenter ces nos presentes lettres de grace par procureur se mestier leur est. Et affin que ces chouses soient fermes et valables a touz jours ou temps avenir, nous avons fait mectre nostre seel en ces presentes lettres, sauve en touz autres cas nostre droit et l'autruy en touz autres. Donné a Molins, ou moys d'aoust, l'an de grace mil troys cens sexante et un.

(Sur le repli, à gauche :) Par monseigneur le duc en son grant conseil, ouquel monseigneur le conte de la Marche⁶, monseigneur le gouverneur⁷ et monseigneur le bailli de Bourbonnois⁸ estoient.