1360, 22 juin. — Puy-en-Velay.

Loÿs, duc de Bourbonnois, conte de Clermont et chamberier de France, a tous ceuls qui ces presentes lettres verront ou orront, salut. Savoir faisons que nous, considerans les bons et aggreables services que nostre amé et feal chevalier messire Jehan le bastart de Bourbon¹, seigneur de Rochefort², nous a fais et fait de jour en jour et esperons que encores face ou tamps a^a a venir pour et en recompensacion d'iceulx, de certainne science et de certain propos, avons donné et donnons audit messire Jehan et a ses hoirs descendans de son corps par donnacion pure et irrevocable solempnelment faicte entre les vifs en telle fourme et maniere que donacions par droit et par coustume puet et doit mielx valoir, et laquele nous ne entendons en rien revocquier, c'est assavoir tout tel droit et telle action et tout ce de proprieté et de possession, saisine, justice, seignourie, reclamacion et autres choses quelconques teue ou expresse que nous avons et poons avoir par quelconques maniere et par quelconques cause et title en toute la terre de Belenave³ et en la justice commune dudit lieu, en quelque lieu et en quelconques partie que ladicte terre et commune justice s'estendent ou puissent estendre, soyent terres gaignables ou non gaignables, prez, pasturaulx, bois, garesnes, estants, aigues, cens, tailles, coustumes, rentes, gaux, gelines, charroy, maneuvre et autres choses quelconques que nous es choses dessus dictes et chascune d'icelles avions et pooyons avoir par quelconques maniere, cause ou title que ce soit, et promettons loyalment et en bonne foy pour nous, nos hoirs et successeurs soubs l'obligacion et ypotheque de nos biens et des biens de nos hoirs et successeurs presens et avenir contre ladicte donacion et les choses contenues en ces presentes ou aucunes d'icelles desoresenavant par nous ne par autre publiquement ou resconduement non venir, ançois ycelle donacion avons et aurons perpetuelment ferme et estable et les choses dessus dictes et chascune d'icelles par nous a lui donnees comme dit est li promectons garantir, deffendre envers tous et contre tous en jugement et dehors a nos propres coulx et despens, en payant parledit messire Jehan ou par ceulx qui de lui ont ou auront cause les charges ou redevances qui sur ce sont ou puent estre dehues se aucunes en y a ou puet avoir, et renonçons quant ad ce a tout ce qui pour aller contre les choses dessus dictes ou aucunes d'icelles pourroit aydier ou valoir a nous, a nos hoirs ou successeurs et audit messire Jehan ou a ses hoirs descendans de son corps grever ou nuire en aucune maniere sauf et reservé a nous et a nos successeurs le fief et souverainneté en tous cas es choses dessus dictes. Si mandons et commandons a tous nos officiers et subgets et especialment aus hommes desdictes terre et justice que audit messire Jehan et aus siens desoresenavant comme a seignour des choses dessus dictes obeïssent sans contredit, et des cens, rentes, yssues, profis et emolumens et autres choses quelconques que nous aus lieux dessus dis avions et pooyons avoir avant ladicte donacion li respondent entierement et aus siens sans contredit tout ainsi et en la maniere comme il faisoient et avoyent acoustumé de faire a nous ou a nos gens pour nous. Et pour que ce soit ferme chose et estable, nous avons fait mettre nostre seel du secret a ces presentes en l'absence du nostre grant, qui furent faictes et donnees au Puy en Auvergne, le vint et deuzieme jour du moys de juuing, l'an de grace mil trois cens et soixante.

(Sur le repli, à gauche :) Par monseigneur le duc, presenz monseigneur le conte de la Marche et de Pontieu⁴, messire Regnaut de Bressoles⁵ et Humbaut du Peschin⁶.