1360, 5 mai. — Aigueperse.

Loÿs, duc de Bourbonnois, conte de Clermont, chamberier de France, lieutenant de monseigneur le roy et de monseigneur le regent le royaume de France es païs d'Auvergne, de Berri et de Masconnois et es ressors d'iceux, a Robert de Riom, receveur general des subsides et imposicions octroiez au païs d'Auvergne par le fait des guerres, salut. Nous avons receue la supplicacion des consouls de Riom contenant que comme monseigneur le comte de Poitiers leur ait octroié certaine grace contenue es lettres de mondit seigneur le conte esquelles ces presentes sont cousues, la exequcion desquelles lettres vous avez delayé et retardé a faire et acomplir par les causes contenues en la rescripcion par vous faites au dos desdictes lettres, et nous ont requis que sur ce, leur veullons pourveoir de gracieux remede, actendu que au temps que yceux suppliants pristent les gens d'armes dont mencion est faite esdictes lettres, les enemis du royaume estoient a grant effort dans la ville du Pont du Chastel, prés de ladicte ville de Riom, et y demorent depuis lont temps, et que lors nuls ne auzoit aller ne chevaucher, et pour ce l'em ne peust fere monstre par devant les mareschaus, et par consequent le tresorier des guerres n'en pouvoit faire compte bonnement. Pour quoy nous, veues lesdictes lettres en rescripcion et qui sommes tous infourmés que yceux suppliants eurent et cuident en leurdicte ville lesdictes gens d'armes desquelles mencions est faite esdictes lettres, vous mandons et comandons que vous acomplissiez et mectés a exequcion le contenu desdictes lettres, non obstant ladicte rescripcion et senz avoir autre escrie ou lettre du tresorier des guerres ne autre mandement quelcunque, car ainsi le declarons et volons estre fait de grace especial si mestiers est, non obstant quelcunques lettres, assignacions ou mandemens faitz ou a faire au contraire. Donné a Aiguepersse, souz nostre seel, le V^e jour de may, l'an de grace mil CCC soixante.

Par monseigneur le lieutenant en son conseil.