1360 (n. st.), 1er février.

Loÿs, duc de Bourbonnois, conte de Clarmont et chanbarier de France, lieutenant de monseigneur le roy, monseigneur le regent le royaume de France, es bailliages d'Auvergne, de Berry et de Masconnois et es ressourz d'yceulx, a nostre amé Robert de Rion, receveur general de la imposicion, fouage et reve a nous ottroiees par les gens du bailliage d'Auvergne ou moys de janvier derrenerment passé pour le fait des guerres, salut. Comme nous aions ordené et comis par noz autres lettres sur le fait desdites imposicions, fouages et reve, noz bien amez mestre Jehan Fournier, Vicaux de Clarmont, Ebraut de Chalencon, chanoenes de Clarmont, messire Erauh, segneur de Saint Nettaire, chevalier¹, mestre Durant Roux, bourgeois de Rion, Jehan Cistel, bourgeois de Clarmont, et pour cause de leur trevalh, leur avons taxé, guagé, c'est assavoir audit chevalier un mouton ^a et a un chascun des autres dessus nomez ung escu par jour des journees qu'ilh affermeront en leur conscience y avoir vaqué si come en leurs lettres de taxacion est plus a plain contenu, nous vous mandons que es dessus nomez vous facez paiement entier de leurs diz guages par la maniere dessus dicte si qu'ilh en soient content em-prenant lettre de recognoysance d'un chascun d'eux de ce que ballé leur aurez, parmi lesquelles rapourtanz aveques ces presentes et copie de leur dite taxacion soubz seel autentique. Nous donnons en mandement a touz ceux qui recevront voz comptes qu'ilh les vous aloent en vozdiz comptes et deduisent de votre recepte sanz contredit. Donné soubz nostre seel, le premier jour de fevrier, l'an mil CCC cinquante et neuf.

Par monseigneur le lieutenant en son conseil.