1357, 1er décembre. — Moulins.

Loÿs, duc de Bourbonnois, conte de Clermont et de la Marche, chamberier de France, a nostre aymé et feal chevalier messire Jam Griveau, seneichal de la Marche, salut. Come nous avons ja pieça ordonné, et du consentemant et volunté de monseigneur le duc de Normendie, que nostre conté de la Marche et avecques ce nostre chastel et chastellenie de Montagu en Combrailhe¹ fussent bailhés par nous et por les nostres a perpetuaulté a nostre aimé oncle messire Jaques de Borbon, conte de Pontiz² et es siens avec toulx les droitz, chasteaulx, villes, honneurs, souveraintés, hommaiges, fiestz, rarefiez, cognoisances, justices aultes, basses et moiennes, sortz, resortz, centz, tailhes, rantes, isues, provenans et aultres droistz et esmolimens et apartenances quelconques des desu diz conté de la Marche, chastel et chastellenie et resort de Montagu por raison du droit de apannaige dont nous luy estions tenus, et sur ce nous ayons bailhé a nostredit oncle la possecion de droit et saisine dedit conté de la Marche, chastel et chastellenie de Montagu avecques leurs apartenances, nous, confians des sens, loyaulsté et proudomie vous mandons et par es lestres commetons que tantost et sans aucunq delay, a-lla requeste de nostredit oncle ou de son certain mandemant ou procureur vous defandés en ladite conté de la Marche et oudit chastel de Montagu et la possecion reelle et de faist d'icelle conté de la Marche, chasteaulx, forteresses et villes d'icelle, d'icelluy chastel et chastellenie de Montagu et de toulx les arpertenances desu dit et aultres quelconques leur baillhés et delivrés en non de nous et comme des de par nous a toulx les subjestz de ladicte conté de la Marche, chastellenie et resort de Montagu, homes, feaulx et austres, et des ja par loctouer de es lestres, nous leur mandons et commandons que doresnavant il obeïssent en hommaiges et aultres oubeïssances a nostredit oncle et a ses gens et des fois et seremans qu'il avoient a feu a nostre tres cher seigneur et pere dont Dieu ait l'ame et a nous a cause d'icelle conté de la Marche, chastellenie et resort de Montagu, nous les commetons et voullons et vous mandons que vous pregnés lestre de recognoissance d'icelluy, que ladite possecion receuvra et icelle nous raportés feablement ou ha nostre aymé compaignon et lieutenant le seigneur de Montagu, et es choses faistes cy et par telle maniere que nostredit oncle ne ces gens n'aient cause de heulx, douloir de nous par vostre default. De ce faire nous vous donnons plain povoir et espres commandemant, mandons et commandons a toulx nostz sujestz, prions et requerons tous austres que en ce fait obeïssent a vous diligemment. Donné a Moulins, soulx nostre seel, le premier jour du mois de decembre, l'an mil IIII^CCCC cinquante sept^a.

Par monseigneur le duc, present en son conseil.