1417 (n. st.), 27 mars. — Cleppé.

La duchesse de Bourbonnois, contesse de Fourez et dame de Beaujeu

A mes tres chiers et bons amys les commisseres sur le fait des aides par monseigneur le roy.

Tres chiers et bons amys, comme vous savés j'ay envoyé plusieurs foiz par devers vous pour le fait de mon assignacion des mille francs que j'ay acoustumé de prandre chacun an sur le grenier a sel du Pont Saint Esperit¹ a cause de mes pors et peages de Chanenay et de la Croy-de-Vues estans sur la riviere du Rosne, et dont me sont deuz plusieurs areraiges du temps passé, et dernierement quant j'ay envoyé par devers vous, ne m'avez fait aucune assignacion, et le tresorier de Languedoc s'escuse que pour la deffence a lui faicte par vous ne souffrera que le grenetier^a me facce aucun payement se autre mandement n'a de vous. Si vous prie, tres chiers et bons amys, tant a tretés comme se puis, que vous veulles mander audit tresorier que en madicte assignacion ne mette aucun empeschement, vous me facce paier par ledit grenetier sellon la fome des lettres de monseigneur le roy, ainsi que par l'espace de XXXV ans et plus en ayons jouïs et possedés monseigneur, que Dieux absoille, et moy. Tres chiers et bons amys, se chouse voulés que fere puisse pour vous, je le feray tres voulontiers et de bons cuer, priant nostre Seigneur qu'il vous ait en sa sainte guarde. Escript a Cleppé², le XXVII^e jour de mars.