1416, 23 novembre.

Anne Dauphine, duchesse de Bourbonnois, contesse de Fourez, dame de Beaujeu et d'Ussel, a nostre bien amé et feal conseiller Guillaume Rajace, auditeur en nostre chambre des comptes a Montbrison¹, salut. Comme pour nostre devocion et entencion nous ayons ordonné en nostre testament et darrniere voulonté, fondé et institué en l'eglise de Nostre Dame de Chappes² estre dictes et celebrees toutes les spemaines de l'an a tousjours mais troys petites messes de nostre dame, desquelx le prieur dudit lieu a pris la charge, et du luminaire, pain, vin et autres choses qui y appartiennent, pour lesquelles nous lui avons donné quinze livres tournois de rante a prandre et avoir chacun an sur nostre terre, chastel et chastellenie d'Ussel³, nous vous mandons et commandons, en commectant expressement, que, appellé avecques vous Pierre Tanart, clerc de la Chambre des comptes a Molins, nostre receveur⁴, et autre officier dudit lieu d'Ussel qui seront a appeller, vous baillez et fetes respondre audit prieur pour lui et sesdiz religieux et successeurs ou temps ad venir, ladite somme de quinze livres tournois de rente de noz cens, rantes, tailles et autres revenues de nostredit chastel et de nostre terre de Terssanges, membres ou ressors d'icelle, avons dehuez chacun an sur noz tenances, et icelle somme assees et assignes tant en deniers, blez et autres choses en valeur convenable lesquelx tenances avons fete ladicte response audit prieur et religieux sur ce, nous quictons pour nous et les nostres et de ce et autres choses appartenants audit cas, vous donnons plain pouvoir et mandement especial, mandons et commandons a tous noz officiers et subgez de nostre ditte chastellenie et autres que a vous en ce faisant, obeissent et entendent diligemment. Donné soubz nostre seel, le XXIII^e jour de novembre, l'an mil quatre cens et seze.

Par madame la duchesse.