1416, 31 octobre. — Moulins (Château).

Nous Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui verront ces presentes lettres, savoir faisons que, comme par consideracion des grans biens et beneffices que nostre createur nous a donnez en ce monde, nous avons, par nostre devocion et l'acroissement du divin office, fondé et institué par la teneur de nostre testament et darniere volunté en l'eglise colligial de Nostre Dame de Molins trois petites messes de l'office de nostre dame, chacune sepmaine, tous les ans, a tousjours mais estre dictes et celebrees par les prebendiers d'icelles, ausquielx nous avons donné et assigné chacun an, pour raison et a cause desdictes messes, douze livres tournois a prandre et avoir chacun an sur nostre terre et recepte d'Ussel¹, comme en nostre testament et darniere voulunté est a plain contenu, ainsi est que presentement nous, desirans icellui nostre testament et derniere voulunté acomplir et enteriner nous estans en vie, quand ad ce, desmaintenant ordonnons, fondons et institutons en ladicte eglise lesdictes trois messes de nostre dame estre dictes et celebrees par trois prebendiers instituez en icelles, lesquelx seront tenus en la fin de chacune messe fere commemoracion pour les mors, et aussi dire et chanter tous les jours en ladite eglise les epistres des grans messes ordinaires d'icelle, et seront corrigez et pugnis par les doïens et chappitre de ladite eglise ou cas qu'ilz feront deffault au service et celebrement desdites messes, comme bon leur semblera, desquelles messes et prebendes nous donnons et conferons l'une par cez noz lettres a messire Guillaume Scassier, prestre de ladite eglise, reservant a nous et aux nostres la collation d'icelle, quant le cas de vacacion eschevra, et pour tout ce nous donnons et assignons a un chacun desdiz prebendiers, chacun an, cent solz tournois a prandre et avoir sur nostredite terre et recepte, c'est assavoir la moitié a la Nativité nostre seigneur, et l'autre moitié a la feste saint Jehan Baptiste. Si donnons en mandement a noz amez et feaulx conseillers les gens et auditeurs de noz comptes en Fourez, et autre a qui il appartiendra, que, prins et receu le serment et promission dudit messire Guillaume Scassier de bien et loyement servir en ladicte prebende et epistre, et registré en nostre chambre desdiz comptes, a icellui prebendier facent paier, finer et deliver un chacun an ladite somme de cent solz tournois, pour raison et a cause de sadicte prebende, aux termes cy-dessus declarés, en rabatant et deduisant audit receveur ladite somme parmi rapportant vidimus de ces presentes pour la premiere fois et quictance dudit prebendier sur ce, chacun an en ses comptes, sans aucun contredit, car ainsi nous plaist-il estre fait et l'avons ordonné de nostre certaine science, non obstant ordonnances, mandemens ou deffences a ce contraire. Donné au chastel de Molins, le XXXI^e jour d'octobre, l'an de grace mil CCCC et seze.

(Sur le repli, à gauche :) Par madame la duchesse, maiste Guillaume Rajace, conseiller madicte dame², present.