1416, 31 octobre. — Moulins.

Nous Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui verront ces presentes lettres. Savoir que, comme par consideracion des grans biens et beneffices que nostre creacteur nous a donnez en ce monde, nous aions par nostre devocion et l'acroissement du divin office fondé et institué par la teneur de nostre testamentet darriere voulunté en l'eglise collegial de Nostre Dame de Molins trois petites messes de l'office de Nostre Dame chascune sepmaine tous les ans a tousjours mais estre dictes et celebrees par les prebendiers d'icelles, ausquelx nous avons donné et assigné chascun an pour raison et a cause desdictes messes douze livres tournois a prandre et avoir chascun an sur nostre terre et recepte d'Ussel¹, comme en nostre testament et darriere voulunté est a plain contenu, ainsi est que presentement nous, desirans icellui nostre testament et darriere voulunté acomplir et enteriner, nous estant en vie, quant ad ce des maintenant ordonnons, fondons et instituons en ladicte eglise lesdictes trois messes de Nostre Dame estre dictes et celebrees par trois prebendiers instituez en icelles, lesquelx seront tenus en la fin de chascune messe fere commemoracion pour les mors, et aussi dire et chanter tous les jours en ladicte eglise les espitres des grans messes ordinaires d'icelle, et seront corrigez et pugnis par les doien et chappitre de ladicte eglise ou cas qu'il feront deffault au service et celebrement desdictes messes comme bon leur semblera, desquelles messes et prebendes nous donnons et conferons l'une par ces noz lettres a messire Thomas Popinat, prestre de ladicte eglise, reservans a nous et aux nostres la collacion d'icelles quant le cas de vacacion escharra ; et pour tout ce nous donnons et assignons a chascun desdiz prebendiers chascun an cent sols tournois a prandre et avoir sur nostredicte terre et recepte, c'est assavoir la moitié a la nativité nostre Seigneur et l'autre moitié a la feste de saint Jehan Baptiste. Si donnons en mandement a noz amez et feaulx conseilliers les gens et auditeurs de noz comptes en Fourez et autres a qui il appartiendra que, prins et receu le serement et promission dudit messire Thomas Popinat de bien et loyaument servir en ladicte prebende et epistre, et registré en nostre chambre desdiz comptes, a icellui prebendier facent paier, finer et delivrer un chascun an ladicte somme de cent solz tournois pour raison et a cause de sadicte prebende aux termes cy dessus declarés en rebbatant et deduisant audit receveur ladicte somme parmi rapportant vidimus de ces presentes pour la premiere fois et quictance dudit prebendiersur ce chascun an en ses comptes sans aucun contredit. Car ainsi nous plaist il estre fait et l'avons ordonné de nostre certaine science, non obstant ordonnances, mandemens ou deffenses a ce contraires. Donné a^a Molins, le XXXI^e jour d'octobre, l'an de grace mil CCCC et seze.