1416, 25 octobre. — Moulins (Château).

Texte établi d'après B.

Anne Dauphine, duchesse de Bourbonnois, contesse de Fourez et dame de Beaujeu, a nos biens amez conseillers Guillaume Rajace, auditeur en nostre chambre des comptes de Montbrison², et Pierre Tavart, clerc de la chambre des comptes a Molins³, salut et dilection. Comme en nostre testament nous aïons donné, legué et octroyé a religieuses personnes les prieur et couvent de Souvigny la somme de cinquante livres tournois d'une partie, et quinze livres tournois d'autre partie, en rente assise pour raison et a cause de certaines messes et anniversaires que nous avons ordonné et fondé en leur eglise pour entencion, laquelle rente nous avons proposé de leur asseoir et assigner en et de nostre terre et chastellenie d'Ussel⁴, aux lieux et mas plus prouchains de la ville de Souvigny⁵, comme en nostredit testament est plus a plain contenu, nous, confians de vostre loyauté et bonne diligence, vous mandons et commandons, en commettant expressement, que, appellé nostre receveur et autres officiers de nostredite chastellenie d'Ussel qui seront appeller, vous transportez es lieux plus prochains de Souvigny et de nos cens, rentes, tailles et autres revenues, drois et usaiges de nostredite terre et chastellenie d'Ussel, a nous dehus chacun an par nos tenemenciers, subgiez et manans de ladite terre, vous baillez, delivrez, assignés et assees en rante ausdis religieux, prieur et couvent de Souvigny, ou a leur certain procureur et commis sur ce, pour et ou nom d'iceulx, la somme de soixante cinq livres tournois de rante pour les causes dessusdites, et pareillement baillez, assees et delivres a religieuses personnes les prieur et couvent de la Volte en Auvergne, des cens, rentes, tailles et aures redevences de nostredit chastel et chastellenie d'Ussel, en rante assise, la somme de vint livres tournois pour raison et a cause du leguat de nostre tres chere dame et mere, que Dieu absoille, fait en son testament, ausdis religieux, prieur et couvent, pour certains anniversaires ordonnés en leur eglise jouxte la teneur de sondit tastament, et icelles sommes leur faites confesser, rappondre et recognoistre a prier et satisfaire doresenavant par nosdiz tenemenciers et subgiez aux noms d'eulx et de leurs successeurs ou temps ad venir, en leur faisant injunction et commandement de par nous que ainsi le facent, ausquelx nous, par la teneur de ces lettres, le commandons par expres, car des sommes d'argent, bles et autres choses par eulx ainsi respondues et recogneues ausdis religieux, prieurs et couvens et a leurs successeurs, nous, yceulx tenemenciers, debteurs et subgiez, avons et voulons estre a tousjours mais quittes et paisibles, et leurs hoirs et successeurs, par devant nous et les nostres en futur, et de ces choses faire enteriner et acomplir nous vous donnons plain povoir, auttorité et mandement especial, mandons et commandons a nos chastellain, procureur, receveur et subgiez de nostre chastel et chastellenie, et chacun d'eulx, si comme a luu appartiendra, que en ces choses faysant vous obeissent diligemment et entendent, sans aucun contredit. Donné au chastel de Molins, le vint-cinquieme jour du mois d'octobre, l'an de grace mil quatre cens et seze.

Par madame la duchesse, monseigneur le bailli de Fourez⁶, et maistre Estienne de la Grange⁷ presens.