1416, 23 octobre. — Moulins (Château).

Nous Anne Dauphine, duchesse de Bourbonnais, contesse de Fourez et dame de Beaujeu, a tous ceux qui ces presentes lettres orront et verront, savoir faisons que, comme par consideracion des grands biens et beneffices que nostre createur nous a donnez en ce monde, nous avons, par nostre devocion et acroissement du divin office, fondé et institué en nostre testament et derreniere volunté quatre petites messes estre dites et celebrees chacune sepmaine de l'an a tousjours maiz en l'eglise des freres mineurs cordelliers de Saint Pourçain¹, c'est assavoir une de la trinité, une de nostre dame et deux de requiem, et, en la fin d'une chacune d'icelles, faire commemoracion pour les mors, ausquelx freres, religieux et couvent nous avons donné et assigné chacun an pour raison et a cause desdites quatre messes, seize livres tournois d'aumosne et pencion annuelle, a prandre et avoir un chacun an sur nostre terre et recepte d'Ussel, comme en nostredit testament et dareniere volunté est plus a plain contenu, ainsi est que presentement nous, desirans ycellui nostre testament et derreniere voulunté acomplir et entretenir <nous estant en vie>, quant ad ce, des maintenant fondons, instituons et ordonnons en ladite esglise desdiz cordeliers lesdites quatres messes estre dites et celebrees doresenavant par la forme et maniere que cy dessus est declarré^a par iceulx freres, religieux et couvent de Saint Porcain, ausquelx nous, de nostre certaine science et bon propos, donnons, leguons et assignons pour ce^b la somme de <vint>^c livres tornois pour ausmone et pencion annuelle, comme dit est, a prandre et avoir un chacun an par lesdiz religieux sur nostredite terre et recepte d'Ussel, c'est assavoir la moitié à la feste de la nativité nostre seigneur, et l'autre moitié a la nativité saint Jehan Baptiste^d. Si donnons en mandement par la teneur de cez lettres a noz amez et feaulx conseillers les gens et auditeurs de noz comptes en Fourez, et autre a qui il appartiendra, que, prins et receu le serement et promission desdiz freres et religieux dehuz et appartenant oudit cas, et registré en nostre chambre desdiz comptes, audiz freres religieux et couvent facent paier, finer et delivrer un chacun an par nostre receveur d'Ussel qui est a present, et sera par le temps ad venir, ladite somme de <vint>^e livres tournois aux termes et pour les causes que dessus exprimees, en rabbatant et deduisant audit receveur ladite sommme, parmi rapportant vidimus de ces presentes pour la premiere fois et quictance des gardien desdiz freres et religieux et couvent sur ce, chacun an en ses comptes, sans aucun contredit, car ainsi nous plaist-il estre fait, nonobstant quelxconques ordonnances, mandemens ou deffences a ce contraires. Et afin que ce soit ferme chose et estable a tousjours mais, nous avons fait mectre nostre seel a ces presentes. Donné ou chastel de Molins, le XXIII^e jour d'octobre, l'an de grace mil quatre cens et seze.