1415, 15 décembre. — Cleppé (Château).

Nous Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui ces presentes lettres verront et orront, savoir faisons que comme nagueres en nostre testament et darreniere volunté nous avons ordonné, fondé et institué une prebende en l'esglise de Saint-Marcellin¹ a dire et celebrer toutes les sepmaynes de l'an a tousjours mais, trois petites messes de saincte^a <Catherine, et une petite messe des mors>, et a la fin d'icelle faire commemoracion des mors, et pour icelles messes dire et celebrer ayons donner en nostredit testamment aux prebendiers d'icelle <quatorze>^b livres tournois de pension annuelle en valeur, a prandre et avoir sur nostre recepte et prevosté dudit lieu de Saint-Marcellin, chacun an, aux termes, <c'est assavoir la moitié a Pasques prouchain venant, et l'autre moitié a la Toussains ensuivant>^c, comme plus a plain en nostredit testament est contenu, est ainsi que nous, desirans tres a cuer icellui testament acomplir en nostre presente vie, perseverans en nostre bon propos, de nostre certaine science, desmaintenant ordonnons, fondons et instituons par la teneur de cez noz lettres, en ladite esglise de Saint-Marcellin, la prebende desdiz <quatre>^d messes, a laquelle desja nous instituons et nommons messire Pierre Guillaume et (espace laissé blanc pour inscrire un prénom) Serment, <prestres>, pour icelles prebendes deservir et lesdites messes dire et celebrer en la maniere qu'il apartient, retenu a nous et a noz successeurs, perpetuellement, la collation d'icelle prebende quant le cas eschevra. Si donnons en mandement a noz amez et feaulx conseillers les gens de noz comptes en Fourez que, recu le serement desdiz prebendiers acoustumé de fere en tel cas, et registré en nostre chambre desdiz comptes, <iceulx>^e prebendiers mettent en possession et saysine de ladicte prebende, et desdiz <quatorze>^f livres tournois le facent payer et satisfere par nostre prevost dudit Saint-Marcellin qui est a present, et sera par le temps ad venir, aux termes acoustumés, ainsi que dessus est dit, en deduysant et rabatant audit prevost dudit Saint-Marcellin qui a present est et sera par le temps ad venir ladicte finance de <quatorze>^g livres tournois, parmi rapportant vidimus de cez presentes par une fois tant seulement, et quictance souffisant sur ce ung chacun an en ses comptes, sans condicion ou difficulté aucune, car ainsi l'avons ordonné et nous plaist estre fait, non obstant queulxconques mandemens, ordonnances ou deffences contraires. Et afin que ce soit ferme chose et estable a tousjours maiz, nous avons fet mettre nostre seel a ces presentes, faites et donnees en nostre chastel de Cleppé², le quinziesme jour de décembre, l'an de grace mil quatre cens et quinze. Presens^h.