1415, 15 décembre. — Cleppé (Château).

Nous Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui ces presentes lettres verront et orront, savoir faisons que, comme nagueres par nosttre devocion, intencion, salut et remede des ames de nous et de nos predecesseurs, nous ayons ordonné, fondé et institué en l'eglise de Saint-Bonnet-le-Chastel¹ une prebende, a dire et celebrer toutes les sepmaynes de l'an, a tousjours maiz, six petites messes qui se diront en ladite esglise par trois prebendiers, c'est assavoir troys de madame sainte Anne, et les autres troys <messes> de de la Marie Magdeleine, et lesquieulx seront tenus a la fin d'une chacune desdites messes dire commemoracion de nous, et, pour icelles messes dire et celebrer, ayons donné audit trois prebendiers vint <et une> livres de pencions annuelle en valeur, a prandre et avoir sur nostre recepte et prevosté dudit lieu de Saint-Bonnet-le-Chastel, chacun an, aux termes c'est assavoir la moytié a Pasques et l'autre moytié a la Toussains ensuivant^a, est ainsi que nous, desirans tres a cuer icellui testament acomplir en nostre presente vie, perseverans en nostre bon propos, de nostre certaine science, des maintenant ordonnons, fondons et instituons par la teneur de ces noz lettres, en ladite esglise de Saint-Bonnet-le-Chastel, la prebende desdittes six messes, de laquelle desja nous instituons et nommons messire Etienne Croz, messire Pierre Calier et messire Piarre Lyonnet, <prestres>, pour^b icelles prebendes deservir et lesdittes messes dire et celebrer en la forme et maniere qu'il appartient, retenu a nous et noz successeurs, perpetuelment, la collacion d'icelle prebende quant le cas eschevra. Sy^c donnons en mandement a nos amés et feaulx conseillers les gens de noz comptes en Fourez que, receu le serement^d desdiz troys prebendiers acoustumé de fere en tel cas, et registré en nostre chambre desdiz comptes, iceulx prebendiers mettent en possession et saysine de laditte prebende et desdiz vint <et une> livres tournois, facent^e payer et satisfaire par nostredit prevost dudit lieu de Saint-Bonnet-le-Chastel qui a present est, et sera <pour>^f le temps ad venir, ladicte summe de vint <et une> livres tornois, parmi rapportant vidimus de ces presentes <pour>^g une foys tant seulement, et quittance souffisant sur ce, ung chacun an en ses comptes, sans contradicion ou difficulté aucune, car ainsi l'avons ordonné et nous plait estre fait, non obstant quieulxconques mandemens, ordonnances <ou>^h deffences a ce contrayres. Et afin que ce soyt chose ferme et estable a tousjours mays, nous avons fet mettre nostre seel a ces presentes, fetes et donnees en nostre chastel de Cleppé², le quinzesme jour du moys de décembre, l'an de grace mil quatre cens et quinze. Presens noz amez et feaulx messire Amier Vert, nostre bailli de Fourez³, Jocerand de Sainte Colombe, escuïer, mestre de nostre hostel⁴, maistre Jehan Tenet, licencié en loys, nostre conseiller et advocat, et Guillaume Rajace, nostre secretaire et auditeur en nostre chambre des comptes a Montbrison⁵, tesmoins a ce appellésⁱ.