1415, 15 décembre. — Cleppé (Château).

Nous Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui ces presentes lettres verront et orront, savoir faisons que comme nagueres en nostre testament et darreniere volunté nous ayons ordonné, fondé et institué une prebende en l'eglise de Sury-le-Contal, a dire et celebrer toutes les sepmaines de l'an a tousjours mays <quatre>^a petites messes, c'est assavoir les deux de tous les sains et sainttes de Paradis, <une>^b des angelz, <et une autre messe de mors>, et a la fin d'icelles fere commemoracion pour les mors, et, pour icelles messes dire et celebrer, ayons donné en nostredit testament au prebendier d'icelles <quatorze livres>^c tornois de pension annuelle en valeur, a prandre et avoir sur nostre recepte et prevosté dudit lieu de Sury-le-Comtal, chacun an, aux termes <de Pasques prochain venant la moitié, et l'autre moytié a la Toussains ensuivant>, comme plus a plain en nostre dit^d testament est contenu^e, est ainsi que nous, desirans tres a cuer icellui nostredit testament acomplir en nostre presente vie, perseverans en nostre bon propos, de nostre certaine science, des maintenant ordonnons, fondons et instituons par la teneur de ces noz lettres en ladite eglise de Sury-le-Comtal la prebende desdites <quatre>^f messes, auxquelles desja nous institutons et nommons messire Jehan Luval, dit Chastaignet, prestre, <nostre prebendier>^g pour icelles prebende deservir et lesdites messes dire et celebrer en la maniere qu'il appartient, retenu a nous et a noz successeurs perpetuelment la collacion d'icelle prebende, quant le cas escherra. Sy donnons en mandement a noz amés et feaulx gens de noz comptes en Fourez que, receu le serment <dudit messire Jehan>^hacoustumé de fere en tel cas, et registré en nostre chambre des comptes, <icellui>ⁱ mettent en possession et saysine de ladite prebende et <de la somme de sept>^j livres tornois, le^k facent payer et satisfaire par nostre prevost dudit Sury-le-Contal qui a present est, et par le temps ad venir sera, aux termes^l que dessus est dit, en deduysant et rebatant audit prevost de Sury-le-Comtal qui a present est et sera par le temps ad venir laditte somme de sept^m livres tornois, parmi rapportant vidimus de ces presentes par une foys tant seulement, et quittance souffisant sur ce ung chacun an en ses comptes, sans contradicion ou difficulté aucune, car ainsi l'avons ordonné et nous plait estre fait, nonosbtant queulxconques ordonnances, <mandemens> et deffences a ce contrayres. Et affin que que ce soyt ferme chose et estable, a tousjours mays, nous avons fe mettre nostre seel a ces presentes. Fetes et donnees en nostre chastel de Cleppé¹, le quinziesme jour de decembre, l'an de grace mil quatre cens et quinze.