1415, 15 décembre. — Cleppé (Château).

(Fol. 1r) Nous Anne Dalphine, duchesse de Bourbonnoy et comtesse de Fourez et dame de Beaujeu, a tous ceulx qui ces presentes lettres verront et orront, savoir faisons que comme naguieres en nostre testament et darreniere volunté, pour nostre devocion et intencion et accroissement du divin office et service de nostre Seigneur, sa benoitte mere et de tous les saincts et sainctes de Paradis, nous ayons ordonné, fondé et instituté ung annyversaire a celebrer lendemain de la feste saint Michiel, en l'eglise des Cordelliers, relligieulx et couvent de noste ville de Montbrison, et, oultre ce, six petittes messes qui se diront tout l'an, chascun jour de la sepmaine, en laditte eglise, c'est assavoir deux de la Trinité, deux du corps de Dieu, et deux du saint Esperit, et a la fin d'une checeune messe, les prestres et religieux qui diront lesdittes messes seront tenu de (fol. 1v) faire commemoracion pour les mors, pour lesquieulx anniversayres et messes dire et celebrer nous ayons donné en nostredit testemient aux gardiens, relligieulx et couvent desdiz Cordelliers la somme de vingt et six livres tournois de annuelle et perpetuelle pension et aumosne, a prendre et avoir chacun an sur nostre tresorier de Fouret qui est a present, et pour le temps ad venir sera, c'est assavoir la moitié a Pasques prouchainement venant, et l'autre moitié a la Toussains ensuyvans, comme en nostredit testament est plus a plaint contenu, est ainsy que nous, desirans tres a cuer icelluy nostre testament accomplir en nostre presente vie, persererans en nostre bon propos, de nostre certaine science, des maintenant ordonnons, fondons et instituons par la teneur de ces noz lettres en laditte eglise des Cordeliers de Montbrison, lesdits anniversaires et messes par la forme et maniere cy-dessus declarees. Si donnons en mandement a noz amet et feaulx conseillers, les gens de nos comptes en Fourez, que, receu desdiz gardien, religieux et couvent des Cordelliers dudit Montbrison, pour eulx et leurs successeurs, le serment dehu en tel cas, et registré en nostre chambre desditz comptes, a iceulx gardien, religieulx et couvent dessusdiz, lesdiz vingt et six livres tournois facent payer et satisfaire par nostredit tresorier de Fourez qui a present est et sera par le temps ad venir, chacun an, aux termes dessuditz, en deduysant et rabattant a nostredit tresorier de Fourez present et pour le temps ad venir, laditte somme des vint et six livres tournois, parmy et exportant vidimus de ces presentes par une fois tant seulement, et quictance souffisant sur ce unge (fol. 2r) chascun an en ses comptes, sans contradicion ou difficulté aucune, car ainsi l'avons ordonné et nous plaist estre fait, nonobstant quelxconques mandement, ordonnence et deffences ad ce contrayres. Et afin que ce soit ferme chouse et estable a tousjours maiz, nous avons fait mettre nostre scel a ces presentes. Faictes et donnees en nostre chastel de Cleppé², le quinziesme jour de decembre, l'an de grace mil quatre cens et quinze. Presens noz amet et feaulx conseillers messire Amier Vert, chevalier, nostre bailly de Fourez³, Josserand de Sainte Colombre, escuyer, maistre de nostre hostel⁴, maistre Jehan Tenet, licencié en loix, nostre conseiller et advocat, et Guillaume Rajace, nostre secretaire et auditeur en nostre chambre des comptes de Montbrison⁵, tesmoings a ce appellez.

Par madame la duchesse.