1415, 16 avril. — Cleppé.

Anne Dauphine, duchesse de Bourbonnois, contesse de Forez et dame de Beaujeu, a touz noz officiers et subgés, salut. Savoir faisons que nous, oÿe la requeste de nostre amé et feal escuïer Jehan de Theliz, contenant que, par feu nostre tres chier et tres amé cousin messire Anthoine, seigneur de Beaujeu, et par feu nostre tres chier et tres amé cousin messire Edouart, seigneur de Beaujeu, que Dieux absoille, aient esté prestez vint […] des plus prouchains de la maison fort de Saen, appartenant audit escuïer, de noz subgez de Montmalast¹, pour gaytier et fere retrait en ladite maison fort, et en ycelle gaytier tant come il leur plairoit, comme puet apparoir par les lettres sur ce, sur lesquelles^a cez noz presentes sont atachiés, en nous requerant que lesdites lettres nous plaise ractiffier^b et confirmer, nous, désirans le bien de nos feaulx et subgez, ainsi que pour deffault des gardes ladite maison fort ne s'en ensuyt aucun inconveniant, et pour autres causes a ce nous mouvans, lesdictes lettres, en tant comme touche lesdiz gaytes, pour fere grant garde et retrait en ladicte mayson fort du Saen, avons ractiffié et confirmé, ractiffions et confirmons par ces presentes, tant come il nous plaira, en priant nostre tres chiere et tres amee cousine, dame Helienor de Beaufort, dame de Beaujeu, que ledit Jehan de Theliz, laisse et face joïr et user desdiz^c vint gueyter tant come nous plaira, come dit est, volons aussi que ces presentes et autres lectres attacheez a icellez soient avant toute come enregistrees en la chambre de nous compte en Beaujeulois, car ainsi nous plaist-il estre fait, et de grace especial l'avons octroïé audit Jehan, et octroïons comme dit est par ces presentes. Donné a Cleppé², soubz nostre seel, le XVI^e jour d'avril, l'an mil CCCC et quinze. Par madame la duchesse^d, messire Amé Vert, bailli de Forez³, et Jocerand de Saincte Colombe⁴, presens.