1414, 12 août. — Cleppé (Château).

Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui verront ces presentes lettres, salut. Savoir faisons que, aujourd'hui, date de ces presentes, notre trés chier et trés amé cousin messire Guy, seigneur de Cousant, chevalier¹, est venu a nous, lequel nous a fet le fié et homage de tout ce qu'il peut tenir et porter de nous en fié a cause de nostre terre, pays et conté de Fourez et Roannoys, au quel fié et homage premierment de lui receu le serement de feaulté acoustumé de fere, nous, ledit notre cousin, avons receu sauf nostre droit et l'autruy. Sy donnons en mandement a noz amés et feaulx gens de noz comptes en Fourez, et a tous noz autrez justiciers et officiers ou a leurs lieutenans, et a un chacun d'eulx, si comme lui appartiendra, que ledit nostre cousin, a cause dudit fié et homage non fet, ne le molestent ne empeschent, ne facent ou seuffrent molester ou empescher en aucune maniere, ains si les chouses dessusdites ou aucuns d'icelles estoyent pour occasion de ce prinses faistes ou empeschees, les lui mectent ou facent mettre ces lettres vehues a pleine delivrance, pourveu qu'il sera tenus de bailler et rendre sa nommee et denombrement des chouses dessusdictes en nostredicte chambre des comptes, ainsi comme il appartient, dedans quarante jours prochains venans. Donné en nostre chastel de Cleppé², soubz nostre seel, le XII^e jour d'aoust, l'an mil quatre cens et quatorze.

Par madame la duchesse, monseigneur le bailli de Fourez³ et Josserant de Saincte Columbe, mestre d'ostel⁴, presens.