1414 (n. st.), 16 mars. — Cleppé (Château).

Anne Dauphine, duchesse de Bourbonnois, contesse de Forez et dame de Beaujeu, savoir faisons a tous que nous fumes devenue et devenons femme et vasselle de mon tres chier sire et cousin le duc de Bourgoingne de tout ce que nous tenons et devons tenir en fyé et hommaige de lui, tant a cause de nostre baronie et seignorie de Beaujeuloys, comme autrement, et jurons aux sains evangilles de Dieu, es mains de messire Jehan de Saint Ilayne, seigneur d'Aviller, chevallier, conseiller et chambellan de mondit sire et cousin, son bailli de Chalon et commis ad ce de part lui d'estre a lui lealle et fealle, et de servir le fyé envers luy, et luy en fere hommaige tel que la nature du fyé le requier en lieu et temps et par la forme et maniere que noz predecesseurs l'ont fait et acoustumé de fere, lui en bailler comme bailli et commis que dessus la declaracion et desnommee que y appartient, ou a autre sur ce aiant povoir desdans le temps contenu es lectres de mondit et cousin addrecees audit bailli pour recevoir de nous les fyé et hommaige que dessus, c'est assavoir dans deus an suyvant la date de ces lettres. Donné en nostre chastel de Cleppé², soubz nostre seel, le XVI^e jour de mars, l'an mil CCCC et treze.

Par madame la duchesse,