1414 (n. st.), 30 janvier. — Cleppé.

Anne Dauphine, duchesse de Bourbonnois, contesse de Fourez et dame de Beaujeu, savoir faisons a tous ceulx qui ces presentes lettres verront que nous, de nostre certaine science et bonne voulenté, avons fait, constitué et ordonné, faisons, constituons et ordonnons par ces presentes nostre procureur especial et irevocable nostre amé et feal escuïer Dalmais de la Porte, porteur de ces noz presentes, c'est assavoir a soy presenter et comparoir pour et ou nom de nous par devant les bailli de Challon et d'Ostum, et leurs lieuxtenans, et l'un d'iceulx, et de fere le serement de feaulté en quoy nous sumez et pouvons estre tenue de fere a mon tres chier seigneur et cousin le duc de Bourgoigne, des choses que nous povons tenir en fié et homaige de lui en nostre terre et baronie de Beaujeulois, et de baillier denombrement par la forme et mainere contenues aux chapistres de feaulté et que noz predecesseurs l'ont fait au temps passé, et de faire toutes autres chose que ad ce pevent et doivent appartenir et est neccessaire et expediant de fere, et de interiner et acomplir le contenu de certaines lectres a nous octroyees, touchans ce fait, par mondit tres chier seigneur et cousin le duc de Bourgoigne, addreçans a sesdiz baillis, leurs lieuxtenans, et a chascun d'eulx, et en oultre de fere procurer et excercer toutes et singulieres autres choses ad ce appartenans et necessaires, et que nous ferions et fere pourrions si nous estoïons en propre personne. Pour lesquelles choses fere et acomplir nous avons donné, et par ces presentes donnons plain povoir, auctorité et mandement especial a nostredit procureur, et promectons en bonne foy et serement, et soubz obligacion de tous noz biens, tenir et avoir ferme et agreable tout ce que par nostredit procureur, pour et ou nom de nous, sera fait et passé en ceste partie, et relever nostredit procureur de toutes charges et satisdacion, avec toutes autres clauses ad ce dehuez et necessaires. En tesmoing desquelles choses, nous avons fait mettre nostre seel a ces presentes et les signer par nostre secretaire. Faictes et donnees en nostre chastel de Cleppé¹, le XXX^e jour de janvier, l'an mil quatre cens et treze.

Et je, Alexandre Mareschal, clerc, tabellion royal et secretaire madicte dame la duchesse, ay esté presens a passer la presente procuracion, comme dessus est contenu. Presens Jocerand de Sainte Colombe, maistre d'ostel madicte dame², et Loÿs de Saint-Paul, escuier.