1413, 28 novembre. — Villefranche-sur-Saône.

Anne Dauphine, duchesse de Bourbonnois, contesse de Fourez et dame de Beaujeu, a tous ceulx qui verront ces presentes lectres, salut. Savoir faisons que, oye la suplicacion et requeste des religieux, gardien et couvent des freres meneurs de nostre ville de Villefranche, contenant que feu noble memoire messire Loÿs, seigneur de Beaujeu, en son testament et derreniere voulenté, donna ausdiz suppliant six livres viennois pour trois procuracions ou prudences et trois anniversaires, que sont tenus pour ladicte somme fere lesdiz freres chancun an le XXIII, XXIIII et XXV jours du moys d'aoust ; item que feu messire Guichart, seigneur de Beaujeu, filz dudit messire Loÿs, donna en son testament et derreniere volenté, ausdiz freres meneurs, soixante sols viennois annuelz ou sexance livres pris une foys pour fere un anniversaire chacun an a semblable jour de son obit, lequel sur le XVII^e jour de septembre ; item que messire Eddouart, seigneur de Beaujeu, filz et heritier dudit messire Guichart, donna ausdiz feres meneurs dix livres tournois annuelles pour dire chacun mecredi a tousjours maiz une messe conventuelle, en nous suppliant et requerant que lesdiz sommes et legas comme dessus est declairé a eulx donnees et laissees leur fassions paier et qu'ilz estoient prestz fere et acomplir les charges dessusdictes, nous, voulans fere et acomplir les lays et legas faiz par lesdiz trespassés noz ancesseurs, et affin que le deuh office pour le remede de leurs ames soit fait, mandons par ces presentes et commandons expressement a nostre tresorier de Beaujeuloys qui a present est et par le temps ad venir sera, que doresenavant un chacun an, paié et delivré aux gardien et couvent desdiz fetes pour lesdittes causes, la somme de dix-sept livres tournois, que montent lesdiz legue a values viennois a tournois, c'est assavoir a chascune feste de Noel huit livres dix sols tournois, et les autres huit livres dix sols tournois a une chascune feste de saint Jehan Baptistes, et parmy ce que lesdiz freres meneurs seront tenus de fere les anniversaires et dire ladicte messe conventuelle, comme dessus est dit, et par rapportant transcript des presentes pour une foys et quictance desdiz gardien et couvent, nous voulons et mandons laditte somme un chascun an, estre comptee a nostredit tresorier¹ en ses comptes et rebatues de sa recepte par noz amez et feaulx gens de noz comptes en Beaujeuloys, ausquelx nous mandons que ainsi le facent, sanz aucun contredit. Donné en nostre ville de Villefranche², soubz nostre seel, le vint huitiesme jour de novembre, l'an de grace mil quatrecens et treze.

Par madame la duchesse en son conseil, Josserant de Sainte-Colombe, maistre d'ostel³, Jenoiez Malatier⁴, presens,