1413, 20 novembre.

Anne Dauphine, duchesse de Bourbonnois, contesse de Forez et dame de Beaujeu, a tous ceulx qui verront ces presentes lettres, salut. Savoir faisons comme il soit venu a nostre notice et cognoissance comme feu de bonne memoyre, noble et puissant seigneur, messire Anthoyne de Beaujeu, nostre predecesseur seigneur^a de Beaujeu, lui estant en vie, astraint et esmeu de devocion en son testament et derreniere voulonté, entre pluseurs autres biensfaiz et legas pour lui delaissié pour ce que Dieu nostre creatour feust servi continuelment apres sa mort, considerans que ses biens ne poroient mieulx estre employes que a servir cellui qui en ce monde les lui avoit donnes et prestiez, et duquel il tenoit et possedoit l'ame et le corps, et aussi que ce feust chose par laquelle il peust parvenir et tendre au royaulme de Paradis, et qui feust cause au remede et salvacion des ames de lui et de ses ancesseurs, desqueles, apres Dieu, il portoit les biens, et affin que ses successeurs ilz feussent participans aucunement a ce, ordonne deux messes a dire et celebrer chacun jour de l'an en l'onneur de Dieu nostre createur, de nostre dame et de leur excellance et venerable court et compagnie celestiale, de saint Jacques, le maire apostre, et de saint Anthoine, confesseur en l'eglise de Nostre Dame de Villefranche¹, et pour ycelles messes vouloit estre paié ou assigné chacun an a ceulx que icelles deserviroient la somme de douze livres viennois, douze afin de vin, douze afin de blez, quatre afin froment, et huit afin de soigle, par ses successeurs qui de lui auroient cause, ainsi comme nous est apparu par certaine clause de sondit testament et derreniere voulonté, pour quoy nous, vehue et oye exposer ladicte clause, voulans de nostre povoir rendre a Dieu ce qui est sien et non retenir les attribus et suffraiges des ames trespassees, considerans le pechié^b et charge que aucunement nous predecesseurs puent avoir encoru envers Dieu nostre createur, qui ou temps passé l'ont souffert sanz y aucunement pourveoir, et que nous y pourrions encorir si ainsi le souffrions, puis qu'il est venu a nostre congnoissance, confians a plain des loyaultes, proudemies et bonnes consciences de mesires Durand Tribulon, Jehan Variel, Hugues Huguani et Jehan Ervart, prestes, yceulx avons instituez, ordonnez et establiz, et par ces presentes instituons, ordonnons et establissons chappellains desdictes chappelles tant comme ilz vivront, en prenant, levant et recepvant les sommes tant de bles, vin comme d'argent dessus contenues et declairees par esgal porcion parmy ce, que lesdiz chappellains ycelles chappelles seront tenus de biens et loyalment deservir chacun an en faisant le demi office chacun jour, reservé a nous ou a nos successeurs apres leur mort la donnacion d'icelles, et pour ce que bonnement a present ne leur porons assigner rantes sur quoy ilz se peussent paier des sommes dessus contenues, nous mandons a noz recever de Belregart² qui de present est, et pour le temps ad venir sera, que les sommes dessus contenues, tant de blez, vin comme argent, esdiz chappellains, c'est assavoir a un chascun d'eulx, sa rate^c et porcion paie, baille et delivre, ou face paier, bailler et delivrer chascun an doresenavant jusques ad ce que ladicte rante leur soit assignee, c'est assavoir le blez et vin a la Saint André et l'argent a l'ascencion nostre Seigneur, a commencer ladicte paie a ladicte ascencion proucheine, pourveu que lesdictes messes ilz commenceront le premier jour de decembre prouchainement venant, l'an present. item avons donné et donnons par ces presentes a tousjours maiz, pour la luminaire desdictes messes, pour les chandoilles et torches necessaires, huit livres pour chascun, que voulons estre paiés par ledit receveur de Belregart et par rapportant transcript de ces presentes pour une foys tant seulement, et quictancez desdiz chappellains et d'un chascun d'eulx, et nous voulons lesdictes sommes estre allouees et rebatues de la recepte dudit receveur de Belregart chascun an par noz amez et feaulx gens de noz comptes en Beaujeuloys, ausquels nous mandons et commandons, ensemble a nostre tresorier, que, les vestemens, calices, messelz, toailles et autre ornemens d'autel, lesquelx appartiennent et sont necessaires a chapelle pour l'office divin, achaptent, baillent et administrent esdiz chappelains, et alouent lesdictes choses es comptes de cellui ou ceulx a qui il appartiendra, sanz aucun contredit. Et affin que ce soit chose ferme et estable a tousjours maiz, nous avons fait seeller ces presentes de nostre seel. Donné en nostre ville de Villefranche³, le vintiesme jour de novembre, l'an de grace mil quatre cens et treze. Par madame la duchesse en son conseil, Josserant de Sainte-Colombe, maistre d'ostel⁴, Jehan Cien, le juge de Beaujeuloys⁵, presens.