1413, 16 novembre. — Villefranche-sur-Saône.

Anne Dauphine, duchesse de Bourbonnois, contesse de Fouurez et dame de Beaujeu, a nostre receveur de Bellevile qui de present est et au temps ad venir sera, salut. ExposÉ nous a esté par noz religieux abbé et couvent dudit lieu que comme feu nostre tres chier et tres amé cousin messire Audoart, seigneur de Beaujeu, que Dieu absoille, ait ordonné en son testament estre païé chacun an a l'eglise du monestaire dudit lieu cent sols de rente vallans cinq frans, par deux anniversaires que doivent fere lesdiz abbé et couvent en ycelle eglise, c'est assavoir le premier anniversaire assemblable jour qui seroit en sepulturés, et l'autres anniversaire le quarantiesme jour ensuivant, pour le remede de l'ame dudit testeur et de ses ancesseurs, si comme peut apparoir par transcript de la clause extraite dudit testament auquel ces presentes sont atachees, en nous humblement suppliant et requerant que lesdiz cent sols feissions paier comme dit est, pour quoy nous, voulans acomplir la derreniere voulenté de feu nostredit cousin, vous mandons que doresenavant vous paies et satisffaictes ausdiz abbé et couvent chacun an pour ladicte cause lesdiz cent sols tournois, c'est assavoir les cinquante sols le duziesme jour du mois d'aoust, au quel jour fut ensepulturé nostredit cousin, et les autres cinquante sols le quarantiesme jour ensuivant, par la forme et maniere contenue audit legation, et par rapportant transcript ou coppie des presentes et quictance desdiz abbé et couvent, avecques certifficacion que lesdiz anniversaires soient faiz, nous voulons et mandons lesdiz cent solz tournois estre comptés et rabatus de vostre recepte par noz amez et feaulx gens de noz comptes en Beaujoloys, sans contredit. Donné en nostre ville de Villefranche¹, soubz nostre seel, le seziesme jour de novembre, l'an de grace mil quatre cens et treze.

Par madame la duchesse, monseigneur de Fougerolle, Josserant de Sainte Colombe, maistre d'ostel², presens,