1412, 6 novembre. — Feurs.

Anne Dauphine, duchesse de Bourbonnois, contesse de Forez et dame de Beaujeu, savoir faisons a tous presens et a venir nous avoir receu l'umble supplicacion de Berthomier Charpin, povre homme de nostre chastellenie et mandement de Chamalet, contenant que il tenoit a chatel de cinq francs et dix gros, deux beufz et une vache d'un sien oncle appellé Jehan de Suzi^a, dudit mandement de Chamalet¹, lessquelz beufz et vache ledit de Suzi voulsi avoir au plus fort du besoing d'icellui Charpin, qui vouloit labourer et semer ses terres, et lors ledit Charpin, ensemble Agnes, femme dudit de Suzi, requirent audit de Suzi qu'il lui pleust de lui laissier encores lesdiz beufz et vache, lequel n'en voult ovecques^b riens fere, et lors ladite Agnes dist audit Charpin que, se il lui donnoit ung franc, que elle lui bailleroit le fueillet d'un pappier ou estoit l'oblige de lui et de sondit oncle desdiz cinq francs et dix gros, lequel fueillet ou estoit ledit oblige ladicte Agnes lui bailla et lui conseilla qu'il preist ung sien voisin bien secret et qu'ilz s'en alassent par devers ung notaire qui ne les congneust point, et, quant ilz seroient par devant ledit notaire, qu'il deist qu'il avoit le nom dudit Jehan de Suzy, lesquelx y alerent, et lui, comme meu de male voulenté et en veu de la temptacion de l'ennemy^c, quant ilz furent par-devant ledit notaire, il fit fere et octroier ladicte quictance audit voisin, et quant il fu venu de fere ladicte quictance ledit Jehan de Suzi le fit appeller a nostre court de Chamalet, et lui fit demander desdiz cinq francs et dix gros a cause desdiz beufz et vache, lequel monstra ladicte quictance en court, laquelle fut mise par devers icelle^d, et ledit Charpin pris et mis en noz prisons et pour icellui cas fut questionné, lequel, sans gehayne, confessa ledit cas estre vray, et d'icelles prisons fut mené en noz prisons a Villefranche², auquel lieu il fut condempné par nostre bailli de Beaujeulois pour ledit cas a estre mis en l'eschielle deux heures en nostredicte ville de Villefranche, et audit lieu de Chamalet a jour de marchié demourer en l'eschielle trois heures, tous ses biens a nous confisquez, et estre banniz par six annees de nostre païs de Beaujeuloys, a laquelle eschielle il a esté par lesdites heures es lieux dessusdiz, pour lesquelz cas et condempnacion il lui a convenu absenter nostredit païs de Beaujeuloys, et retourneroit voulentiers en nostredit païs s'il nous plaisoit impetrer sur ce nostre grace et misericorde, si comme il dit, en nous requerant que comme en tous autres cas ledit Charpin ait esté de bonne vie et honneste conversacion, sans avoir esté reprins, actaint ne convaincu d'aucun autre villain blasme ou reprouche, il nous pleust a lui impetrer nostredite grace ; pourquoy nous, eue consideracion aux choses dessusdictes et a ce que ledit Charpin est chargiez de seurre et de quatre petis enfans, et de son pere vieil et ancien, qui ne peut gaigner pain et qui seroient en aventure de mendier leur vie, et aussi la pugnicion qu'il a eue sur ce a icellui Charpin, de nostre certaine sceience et grace especial, avons rappellé et rappellons dudit baniment, lequel baniment nous avons revocqué, revocquons et mectons du tout au neant par ces presentes, et restituons tous ses biens qui a nous estoient confisquez pour cause de ce, et l'avons remis et restitué a sa bonne fame et renommée au païs. Sy donnons en mandement a nostre bailli de Beaujeuloys, ou a son lieutenant, et a touz nos autres justiciers et officiers, ou a leurs lieuxtenans, et a chascun d'eulx, si comme a luy appartiendra, que ledit Berthomier Charpin laissent, facent et sueffrent joïr et user plainement, paisiblement et perpetuelment de nostredite grace, rappel et octroy, sans molester ne souffrir estre molesté en corps ne en biens au contraire. Et afin que ce soit ferme chose et estable a tousjours mais, nous avons fait mettre nostre seel a ces presentes, sauf en autres choses nostre droit et l'autruy. Donné a nostre ville de Feurs³, soubz nostre seel, le VI^eme jour du mois de novembre, l'an de grace mil quatre cens et douze

Par madame la duchesse, messires Guichart d'Ulphé⁴, Estiene d'Entraigues⁵ et maistre Denis⁶ et Jehan Puys⁷, freres, et plusieurs autres presens,