1412, 15 septembre. — Cleppé.

Anne Dauphine, duchesse de Bourbonnois, contesse de Fourez et dame de Beaujeu, a noz amez et feaulx les gens de nostre chambre des comptes a Montbrison, salut. Comme ja pieça nous aions eu complainte de plusieurs notaires de nostre ville de Montbrison et autres leurs successeurs, contenant que, un chascun an, ilz nous paient certains servis a cause des bans que leurs predecesseurs souloient avoir en une maison et environ icelle, devers la partie de la maison et hostel des hoirs de Jehan Barbier, de nostredicte ville, ou noz predecesseurs contes de Forez souloient faire tenir la court ordinaire de Forez, lesquelles maison et bans sont et ont esté longtemps en ruyne, et n'y a fors tant seulement que les mures et les places vuides ou souloient estre lesdis bans, lesquelles mures et places sont situees a costé le pont que l'en va de la grant rue a Nostre Dame, du costé tenant a la riviere de Viseze, et d'autre part jouxte la maison dudit feu Jehan Barbier, de la partie de la bise, et la rue et icelle place vuide entremi tant comme ladicte maison dudit Barbier s'estend, ou souloient estre lesdis bans, et jouxte la maison de Colin le Fauconnier, qui fu de la Chaussi, sa femme, d'autre part, lesquelz, humblement nous ont supplié que, actendu qu'il n'y a siege ne habitacion aucune ne court, passé a cinquante ans, sauf le plus, et depuis que ladicte ville fu destruicte de feu par les Anglois, ou ilz puissent faire aucun prouffit pour paier lesdis servis a nous deuz, que d'iceulx servis les voulsissions tenir quictes et faire tenir envers nos receveurs a tousjours mais, nous, qui ne vouldrions point estre chargee de choses indeues, et qui vouldrions descharger l'ame de nos predecesseurs si chargiez en estoient, voulons et vous mandons que lesdiz notaires et autres a qui peut toucher, desdis servis vous deschargez, et lesquels par ces presentes nous deschargeons desdis servis, et que lesdictes mures et places et lesdis bans qui souloient estre dedens ladicte maison et dehors, actendu que ladicte place est tornee en ruyne et vacacion et ne nous porte a present aucun prouffit, vous faictes crier es lieux accoustumez a servis compectans que puisse supporter la chose, a nous paier et a noz successeurs un chascun an perpetuelment les servis qui dessus seront mis, et icelles mures et places desdis bans que souloient estre dedans ladicte maison et dehors au plus offrant bailliez et delivrez, parmy ce que celluy qui lesdictes mures et places, hors lesdictes mures ou souloient estre lesdiz bans, prendra, sera tenuz de nous paier entraiges telz que par vous sera regardé, et lesdiz servis perpetuelment a nous et a noz successeurs telz que dessus lesdictes mures et places vuides desdiz bans seront mis, et ce faictes bien et diligemment, car de ce faire vous donnons povoir et mandement especial. Donné a Cleppé¹, soubz nostre scel, le XV^e jour de septembre, l'an mil quatre cens et douze.

Par madame la duchesse,