1412, 5 août. — Cleppé.

Nos Anne Dalphina, duchesse de Bourbonnoys, contesse de Fourez et dame de Beaujeu, savoir faisons a tous ceulx qui ces presentes lettres verront que nous, de nostre certaine science et bonne voulunté, avons fait establi, constitué et ordonné, faisons, constituons, ordonnons et establissons par cez presentes nostre procureur general certain, especial et irrevocable nostre tres chier et bien amé chivalier, messire Guichart d'Ulphé, nostre bailli de Fourez¹, pourteur cez noz presentes lettres, c'est assavoir a soy presenter et compareoir pour et ou nom de nous par davant mon tres chier seigneur et cousin le duc de Bourgoingne, et lui fere et recongnoistre les foy et homage et touz autres chapitres de feaulté en quoi nous lui summes et pourions estre tenus a cause de nostre terre et baronie de Beaujuloys, par la forme et maniere que par noz predecesseurs est acoustumé de fere, et de jurer et de fere au nom de nous et pour nous le serement de feaulté, ensemble tous les chapitres en tel cas acoustumé de fere, et toutes autres chouses que ad ce peuvent et doyvent appartenir et est necessayre de fere, de demander, requerir, et avoir de mondit seigneur et cousin terme, respit et souffrance sur ce dehu et que lui plaira de fere, signiffier et expouser a mondit seigneur et cousin la diligence par nous fete, de fere et acomplir les choses appartenant es foy et homage dessusdiz, et autrez noz excusations touchans ledit fait si besoing est, et en outre de fere, procurer et exercer toutes et singuleres autrez choses en ce appartenans et necceseres, et que nous ferions et fere pourrions si nous estions personnelment en presence et en propre pesonne ; desquelles chouses et chascunnes d'icelles fere passer, acomplir et accorder nous avons donné, et par ces presentes donnons plain povoir, auctorité et mandement especial a nostredit chevalier, bailli et procureur dessus nommé, et promettons en bonne foy et serement, et soubz l'obligance de tous noz biens, tenir et avoir bon, ferme et agreable tout ce que per nostredit chevalier, bailli et procureur, par nous et au nom de nous, sera fait, passé, dit, procuré et accordé envers mondit seigneur et cousin en ceste partie, et relever nostredit chevalier, bailli et procureur de toute charge et satisdacion avecques toutes autrez clauses ad ce en tel cas dehues et necesseres. En tesmoing des quelles choses, nous avons fait mectre nostre propre seel a cez noz presentes lettres, et signer par le noctayres royal cy-dessoubz escript. Faictes et donnees en nostre chastel de Cleppé², le cinquiesme jour d'aoust, l'an mil quatre cens et douze, presens noz amez et feaulx Jehan de Serre, maistre de nostre hostel³, et Bertrand de Boutheon, nostre escuïer⁴, tesmoings ad ce appelles et requis.

Et moy Pierre de Crosolhes, cler et notaire du roy nostre seigneur, qui es chouses dessus dictes, faictes, passees et accordees par nostredicte dame, ay esté presens, stipulans et receveurs comme notaire public, et a sa requeste et de son commandement ay signé ces presentes, en tesmoing des chouses dessudictes, de mon seing manuel cy amprés mis,