1412, 26 avril. — Cleppé.

Nous Anne Dauphine, duchesse de Bourbonnoys, contesse de Fourez et dame de Beaujeu, savoir faisons a tous ceulx qui ces presentes lettres verront que nous, de nostre certaine science et bonne voulenté, avons fait, establi, constitué et ordonné, faisons, constitutons, ordonnons et establissons par ces presentes nostre procureur general, certain, especial et irrevocable, nostre tres chier et bien amé chevalier et conseiller messire Philibert, seigneur de l'Espinace¹, porteur de ces noz presentes, c'est assavoir de fere presenter et comparoir pour et en nom de nous par devant nostre tres chier seigneur et cousin leduc de Bourgoingne, et lui fere et recongnoistre les foy et hommaige et tous autres chappitres de feaulté en quoy nous le summes et pouvons estre tenue a cause de nostre terre et baronnie de Beaujeuloys, par la forme et maniere que par noz predecesseurs est acoustumé de fere, et de jurer et fere au nom de nous et pour nous le serement de feaulté, ensemble tous les chappitres en tel cas acoustumé de fere, ce toutes autres choses ad ce peuvent et doyvent appartenir et est necessaire de fere, de demander, requerir et avoir de mondit seigneur et cousin terme, respit et souffrance sur ce de lui, et que lui plaira de fere signiffier et exposer a mondit seigneur et cousin la diligence par nous fete, de fere et acomplir les choses appartenans es foy et homaige dessusdit, et autres noz excusasions touchans ledit fait si besoing est, et, en oultre, de fere, procurer et excercer toutes et singulieres autres choses en ce appartenans et necessaires et que nous fairons et fere pourrons se nous estions personelment en presence et en propre personne, desquelles choses et chascunes d'icelles fere, passer, acomplir et accorder nous avons donné, et par ces presentes donnons plain povoir, auctorité et mandement especial a nostredit chevalier, conseiller et procureur dessus nommé, et promectons en bonne foy et serement, et soubz l'obligacion de tous noz biens, tenir et avoir bon, ferme et agreable tout ce que par nostredit chevalier, conseiller et procureur, par nous et en nom de nous, sera fait, passé, dit, procuré et accordé envers mondit seigneur et cousin en ceste partie, et relever nostredit chevalier, conseiller et procureur de toute charge de satisdacion, avecques tous autres clauses a ce et en tel cas dehues et necessere. En tesmoing desquelles choses^a, nous avons fait mettre nostre propre seel a ces noz presentes, et signer par le notaire royal cy-dessoubz escript. Faictes et donnees en nostre chastel de Cleppé le vint et sixieme jour d'avril, l'an de nostre seigneur mil quatre cens et douze. Presens noz amez et feaulx messires Guichart d'Alperhieu, chevalier, nostre bailli de Fouré², et Guillaume Rajace³, clerc de nostre chambre des comptes en nostre païs de Fourez, tesmoings a ce appellez.

Et moy Pierre de Crosolhes, cler et notaire du roy nostre seigneur, qui es chouses dessus dictes, faictes, passees et accordees par madicte dame, ay esté presens, stipulans et receveurs comme notaire public, et a sa requeste et de son commandement ay signé ces presentes, en tesmoing des chouses dessudictes, de mon seing manuel cy-amprés mis,