1411, 19 mai. — Cleppé.

Anne Dauphine, duchesse de Bourbonnois, comtesse de Foreiz et dame de Beaujeu, a tous ceux quices presentes lettres verront, salut. Receue avons humble supplicacion de messires Pierre Colet, Jehan Aragon et Alegret Jodonet, prestres, nos prebendiers en nostre eglise collegiale de Nostre Dame de Montbrison, contenant que, comme feu de bonne mémoire messire Guy, conte de Forez cui Dieu absoille, nostre predecesseur, fondeur deladite eglise, aye fondé en icelle eglise trois prebandes desquelles lesdits suppliants sont prebendiers, et icelles prebendes aye dotees que quinze livres forts de Lyon, qui valent trente livres tournois par an, lesquelles il ordonna estre payees chacun an, en et sur les rentes du marché de Saint Garmier, par celluy qui leve nos rentes illec, a deux termes, l'un a la feste de la Toussains et l'autre au mois de may perpetuelment, comme plus a plain nous est aparu por les lettres dudit fondeur scellees de son seel, et neanmoins ledit receveur a Saint Garmier ne ses predecesseurs illec n'a voulu de pieça ne ne veut encores payer esdits suppliants ne a leurs predecesseurs prebendiers desdites prebendes fors que quinze livres tournois, en quoy lesdits suppliants perdent et ont perdu chacun an quinze livres tournois etc. […], et bien qu'ilz nous ayent plusieurs foys supplié et requis qu'il nous pleut leur pourvoir sur ce, selon la teneur des lettres de leurdite fondation, pour ce est il que nous, ces choses considerees, que ne voulons aucune chose diminuer des droits de l'eglise, ne de la fondation de nos predecesseurs mais les acroistre de nostre povoir etc., veues aussy les lettres de mon seigneur que Dieu absoille et la teneur d'icelles a commenceants : "Loÿs etc." et finissants "IIII^XX et X" etc., veue la teneur de leurdite fondation contre lesquelles ne voulons aucune chose estre faite ne entreprise, considerees les choses dessus dictes et affin qu'ils ayent moyen de soustenir leur vie et soient plus inclins a prier Dieu pour nous, mondit seigneur et leurdict fondeur, cui Dieu absoille, de nostre certaine science et grace especial, avons loé, agree, ratiffié, approuvé et confirmé, et par ces presentes ratiffions, louons, agreons et confirmons lesdictes lettres de feu mondit seigneur et de leurdict fondeur et les choses en icelles contenues, et volons que lesdits suppliants et leurs successeurs, prebendiers desdictes prebendes, ayent et perçoivent chacun an doresenavant la somme de quinze livres forts de Lyon qui valent trente livres tournois, c'est assavoir chacun d'eux le tiers a prendre et avoir sur nostre receveur dudict Saint Galmier¹, aux termes et par la forme et maniere que il est contenu ez lettres de feu mondict seigneur et fondeur, en faisant le service divin etc. Donné a Clepé², sous nostre seel, le dix neufvieme jouer de may, l'an mille quatre cens et onze.