1411 (n. st.), 17 février. — Montbrison.

Anne Daufine, duchesse de Bourbonnois, comtesse de Forez et dame de Beaujeu, a tous presens et a venir, salut. Nous avions receu humble supplication de religieuse personne frere François Jacerand, prieur de nostre prieuré de Gumieres¹, que, comme ledit prieuré soit fondé par nos predecesseurs, comtes de Forez, lequel est scitué en notre mandement de Lavieu², hors de forteresse et en lieu champestre, en un grand trespas de gens armez, qui, au tems passé, par plusieurs fois ont fouillé, pillé et dommagé ledit prieuré de calices et plusieurs autres joyaux, pour deffaut de ce que les prieurs, qui lors estoient, ni a present, n'ont lieu ou ils fissent leur retraite. Et il soit ainsy que nous ayons un petit hostel de large et de long de trois brasses ou environ que, anciennement, fut de messire Fulque de Bouteon³ et est scitué auprez le chemin qui va de la grande porte en nostre donjon dudit lieu, devers la bize d'une part, et l'hostel de nos hommes de Margerie, d'autre part, et la fontaine du chastel, de l'autre part, lequel hostel ledit prieur nous a, pour Dieu et aumosne, requis de la donner audit prieuré pour soy et ses biens retraire, comme dit est, au temps de guerre et autrement. Pour ce est il que nous, ces choses considerees, audit prieur et prieuré, et a ses successeurs prieurs dudit prieuré de Gumieres, par ces presentes donnons ledit hostel perpetuellement à tousjours mais etc. Donné en nostre ville de Montbrison le dix septieme jour de fevrier l'an mil quatre cens et dix.