1411 (n. st.), 9 février. — Montbrison.

Nous Anne Dauphine, duchesse de Bourbonoys, contesse de Forez et dame de Beaujeu, a tous ceulx qui ces presentes lettres verront, savoyr faisons que nous, de nostre certainne science et plaine volenté, faisons, constituons et establissons nostre procureur general et especial nostre tres chier et bien amé cousin, messire Edart de Lavieu, chevalier, seigneur de Feugerroles¹, a soy presenter et comparoir pour nous et au nom de nous par devant mon tres chier sire et cousin le duc de Bourgoigne, pour fere le fié ethomage des choses que sont et meuvent de son fié a cause de ce que nous appertient, puet et doit appartenir de la baronie terre de Beaujoloys et ressor d'icelle, au quel nostredit procureur nous avons donné et donnons plaine puissance, auctorité et mandement especial de presenter et fere ledit fié et homage, et jurer tous les chapitres de feaulté et fere les obligacions sur ce dehues et necessere, par la forme et maniere qu'il appartient en tieul cas et que noz predeccesseurs ont acostumés de fere, et que nous ferions et fere pourrions et deuvrions si nous estions presentes en nostre propre personne, et promectons en bonne foy et soubz obligation de tous noz biens meubles et immeubles presens et a venir, que nous avons bon et agreable tout ce que aura esté fait par nostredit procureur en faisant les choses dessusdictes, et volons lui estre relevé de totes charges et satisdacion, et l'en relevons par la teneur de cez presentes, et promectons de non venir au contrayres avec totes renonciacions de fait et de droit opportunes et a ce necsesseres. En tesmoign de ce, nous avons fait mectre nostre seel a ces presentes et fait signes par le tabellion cy-dessoubz escript. Fectes et donnés en nostre ville de Montbrison, le IX^e jour de fevrier, l'an de grace mil quatre cens et dix, presens nobles hommes Jehan de Serra, escuïer et maistre de nostre hostel², et Loÿs de Lorgu, escuier, tesmoigns a ce presens et requis.