1403, 14 juillet. — Sury-le-Comtal.

Anne Dauphine, duchesse de Bourbonnois, contesse de Forez et dame de Beaujeu, a tous ceulx qui veront ces presentes lettres, salut. Savoir faisons que nous, confians a plain du sens, loyaulté et bonne diligence, et par le bon rapport qui fait nous a esté de la personne de Jehan Greiseu de Saint Victour et pour contemplacion des bons et agreables services que feu Jehan Greysieu son pere, jadix nostre prevost audit lieu, nous [a] fait en son vivant, oudit office icellui Jehan son fil avons institui, ordonné et establi, et par ces noz presentes instituons, ordenons et establissons nostre prevost receveur, greffier et clerc de noz papiers et registres de nostredicte chastellenie de Saint Victour¹, pour et ou lieu de Michel Faure, par avant nostre prevost et greffier audit lieu qui presentement en a volu estre deschargé, aux gaiges, drois, prouffiz et esmolumens acostumés tant qu'il nous plesra, auquel Jehan Gresieu nous avons donné et donnons par ces presentes plain povoir, auctorité et mandement especial de regir, gouverner et excercer lesdiz offices de prevosté et clergé bien, dehuement et loyalment ainsi que a bon et loyal officier appartient a faire, et de demander et recevoir noz icelles servis, cens, rentes, reddevances et de fere et en registrer par davant nostre chastellain audit lieu tous registres et procés et de fere toutes autres choses quelxconques appartenant esdiz offices de prevosté et clergé, en nous rendent bon et loyal compte ou a ceul a qui il appartindra. Si donnons en mandement a noz amez et feaulx gens de noz comptes en Forez que, premierement et avant toute heure pris le serement dudit Jehan a acostumé a fere en tel cas et plege souffisant, ycellui Jehan Greisieu mectant en possession et saisine desdit offices de recepte et clergé donné comme desus^a, par la forme et maniere que ledit Michel Faure tenoit et portoit iceulx offices, en deboutant tous autres et lui baillent realment et de fait les terriers, registres et autres enseignemens appartenans esdis offices de recepte et clergé, car ainsi nous plaist estre fait, et audit Jehan l'avons octroyé et octroyons par ces presentes. Donné a Sury le Contal², soubz nostre seel, le XIIII^e jour de juillet, l'an mil IIII^C et trois.