1390, 23 juillet.

Anne Dauphine, duchesse de Bourbonnois, comptesse de Clermont et de Forez, a toux ceulxz qui nos presentes lettres verront, salut. Savoir vous faysons que nous, conffians a plaim deu sanz, loyaulté et bonne diligence de Johean de Rat de nostre ville de Suri le Contal, ycelui Jeham avons instituy, ordenné et establi et par nous presentes instituons, ordonnons et establissons nostre prevost et receveur en nostre chastellenie dudit lieux de Sury le Contal¹ aux gaiges, proffiz et esmolimenz acoustumez tant comme il nous pleira, auquel Jeheam da Rat nous donnons plaim povoir, auctorité et mandement especial de regir et governer ladicte prevosté ainssi comme a bon et loyal officier appertient et de recevoit nous tailles, cens, rentes et redevences et autres chosses quelconques audit office de prevosté en nous rendant bon compte et loyal ou a ceulz a qui il appartiendra. Si donnons en mandement aux gens de la chambre des comptes en Fouurés que, avent tout heure pris le serrement dudit Jeheam tel comme il appartient en tel cas et pleyge sou[ffisant], que dudit office le mettent en possession et deboutent touz autres car einssi nous plet estre fait. Donné a Molins, soubz nostre seel, le XXIIII^e jour de juillet, l'an mil CCC IIII^XX et dixz.