1388, 15 septembre.

Anne Dauphine, duchesse de Bourbonnois, contesse de Clermont et de Forez, a touz ceulx qui ces presentes lettres verront, salut. Savoir faisons que par le bon raport, souffisance, prodomie et bone diligence que nous avons heu de Pierre Gordin¹, clerc monseigneur et les nostre, ycellui Perre Gordin avons fait, ordenné et establi, faisons, ordenons et establissons par ces presentes examineteur des causes de nostre procureur de Forez aux gaiges de vint frans que autresfois ont esté taxez par nous et nostre conseil a Pierre Coulin, qui paravant gouvernoit ledit office, chascun an et aux autres droiz, prouffiz et esmolumens acoustumez tant comme il nous pleira, et lui avons donné et donnons par ces presentes plain povoir, auctorité et mandement especial de fere et excercer ledit office d'exeminateur en et par toute nostre conté et ressors de Forez, et fere toutes les choses que a ce appartenent et deppendent d'icelles. Mandons a nostre tresourier de Forez qui est a present ou qui par le temps advenir sera que audit Pierre Gordin paie un chascun an lesdiz XX frans par semblables termes que noz autres officiers ont acoustumé de paier, et par raportant ces presentes ou vidimus d'icelles et quictance dudit Pierre Gordin, nous voulons et mandons aux gens et auditeurs des comptes monseigneur que tout ce que ledit tresourier paié ainsi lui aura pour sesdiz gaiges lui soit alloé en ses comptes et rabatu de sa recepte sanz contredit aucun. Mandons a touz les justiciers, officiers et subgiez monseigneur et de nous que audit Pierre Gordin en faisent sondit office et les autres choses appartenant ou qui puent en deppendre d'icellui obeïssent et entendent diligement et lui prestent conseil, confort, favor et aide se mestiers est et par lui ou ses commis et deputez en sont requis. Donné en tesm[oin] de ce, soubz nostre seel, le XV^e jour de septembre, l'an mil CCC IIII^XX et huit.

Par madame la duchesse, present Bernart de Villers².