1387, 5 décembre. — La Chaucière.

Anne Dauphine, duchesse de Bourbonnois, contesse de Clermont et de Fourez, a touz ceulx qui verront ces presentes lettres, salut. Savoir faison que nous, confians a plain du sens, loyauté et bonne diligence de Girardin de la Lande, icellui avons fait, institué et ordené, fai[sons], instituissons et ordenons prevost et receveur de nostre chastellenie et mandement de Cro[set]¹ aux gaiges, proffiz et esmolumens acoustumez tant qu'il nous plera, auquel Girardin nous avons donné et donnons par ces presentes plain povoir et mandement especial de prandre, cuillir et recevoir toutes noz rentes tant en deniers comme en blez, gelines et autres esmolumens quelconques a nous appartenans, et de fere et excercer, regir et gouverner toutes […] et singulieres chouses que a loiaul et bon prevost et receveur appartient de fere, mandons et […] commandons a tous noz subgiz, prions et requerons tous autres que audit Girardin nostre prevost en faisant et excercent sondit office dehuement a lui obeïssent et entendent d[iligement], et mandons a noz amez et feaulz les gens de nostre chambre des comptes en Fou[rez] que ledit Girardin mettent en saisine et possession dudit office de lui le ser[ement] et cacion suffisante en la maniere acoustumee, et ses gaiges li comptez et rabatez de s[a] recepte en ses comptes ainssi comme il est acoustumé de fere. Donné soubz nostre seel, en nostre chastel de la Chauciere², le V^e jour de decembre, l'an mil CCC IIII^XX et sept.