1386, 3 mai. — Cleppé.

Anne Dauphine, duchesse de Bourbonnois, contesse de Clermont et de Forez, a touz ceulx qui noz presentes lettres verront, salut. Savoir faisons que nous, confianz a plain du senz, loyaulté et bonne diligence de nostre amé escuier Bertrain Chal, ycellui avons establi, faisons, ordenons et establissons nostre capitaine et chastellain de nostre chastel et chastellenie de Cleppé¹, tant comme il nous pleira a monseigneur et a nous, aux gaiges, proffis et esmolumens acoustumez, auquel Bertrain nous, par noz presentes, donnons plain povoir, auctorité et mandement especial de bien regir et gouverner lesdiz office de capiterrie et chastellenie par la forme et maniere que appartient a bon et loyal cappitaine et chastellain, mandons a touz les justiciers, sergens et subgez de ladicte chastellenie que a nostredit cappitaine et chastellain en exercent lezdiz offices de cappitarie et chastellenie obeïssent et entendent diligement, et a nostre prevoust dudit lieu mandons par noz presentes que des gaiges acoustumés a ppaier a son predecesseur cappitaine et chastellain le face joïr et paier en contraingnant touz rebelles qui refuseroient de paier ses gaigez a constinuez de paier es autres ses predecesseurs comme dit est. Mandons a nostre bailli de Forez que en prenant le serement de lui avant toutes heures le mectent en possession et saisine dudit office de cappitainerie et chastellenie, car ainssi le voulons estre fayt. Donné a Cleppé, soubz nostre seel, le III^e jour de may, l'an mil troys cens quatre vins et six.