1385, 10 avril. — Souvigny.

Anne Dauphine, duchesse de Bourbonnois, contesse de Clermont et de Forez, a tous ceulz qui ces presentes lettres verront, salut. Savoir faisons que nous, confiens a plain du senz, loyauté et bone diligence de Jehan Raynaut¹, ycellui avons commis et establi et par ces presentes le commectons et establissons nostre prevost et receveur de Chastiauneuf² aux gaiges, proffiz et esmolumens accoustumez. Si mandons au chastellain et capitain dudit lieu que dudit office le mette en saisine et en possession en lui baillant le papier et terrier de ladicte prevosté et recepte en prenant dudit Jehan son serment et pleges tel et si bon et comme il appartiendra, lequel office nous voulons qu'il joïsse et use paisiblement tant comme il nous plaira. Si mandons aux auditeurs es genz des comptes monseigneur que, les gaiges tel comme les autres prevos ses devanciers ont accoustumé a avoir pour chascun an, audit Jehan nostre prevost deduisent et rabatent de sa recepte a touz ces comptes tant comme il demorra oudit office, et audit chastellain et capitain dudit lieu mandons que audit Jehan, en excercent ledit office de prevosté, donne confort, conseil et aide se mestier en a et par lui en est requis. Donné a Sovigny³, soubz nostre seel, le X[^e] jour d'avril, l'an mil CCC III^XX et cinq.