1384, 30 septembre. — Bourbon-l'Archambault.

Anne Dauphine, duchesse de Bourbonnois, contesse de Clermont et de Forez, a touz ceulx qui verront des presentes lettres, salut. Savoir faisons que nous, confiens a plain du senz, loyauté et bone diligence de Petit Tachon de Glené, escuier¹, ycellui avons fait, instituit et ordené, faisons, instituons et ordenons, a la requeste de nostre bien amé le bailli de Bourbonnois², capitaine et chastellain de nostre chastel et chastellenie de Virignieu³ aux gaiges, proffiz et emolumens accoustumez tant comme il nous plaira, auquel Petit Tachon de Glené nous avons donné et par ces presentes donnons plain povoir et mandement de gouverner et excercer lesdiz offices bien et convenablement, et generaument de fere toutes et singulieres choses que a bon et loyal capitaine et chastellain appartienent de fere. Mandons et commandons a touz noz subgez, requerons touz autres que, audit nostre capitaine et chastellain en faisent et excercent sesdiz offices dehuement, a lui obeïssent diligement. Et donnons en mandement a noz amez les genz des comptes monseigneur que les gaiges qui paié li seront par nostre receveur, il allouent et rabatent audit receveur en ses comptes par ces presentes, rapportans ou copie d'icelles avec quittance dudit nostre capitaine et chastellain. Donné a Bourbon⁴, soubz nostre seel, le darrier jour de septembre, l'an mil CCC IIII^XX et quatre.