1446, 14 décembre.

Nous Agnes de Bourgoigne, duchesse de Bourbonnois et d'Auvergne, congnoissons et confessons avoir eu et receu de Jacine l'Aubespin, commis par monseigneur le roy a recevoir es bas et hault paÿs d'Auvergne l'aide ordonné estre mis sus esdiz paÿs pour faire cesser la refformacion que mondit seigneur le roy avoit ordonnee estre faicte en iceulx paÿs l'annee derrenierement passee, la somme de trois mille livres tournois, laquelle somme les gens des trois estaz d'iceulx paÿs avoient et ont ordonnee et voulu avoir esté sur eulx mise sus oultre et par dessus la somme principale dudit aide, et icelle voulu a nous estre baillee et delivree par ledit receveur des deniers de sadicte recepte pour aucuns plaisirs et services par nous faiz aux habitans desdiz hault et bas paÿs d'Auvergne, ainsi que par lettres patentes de mondit seigneur le roy, fetes et donnees a Rasilly prés de Chinon le XXVI^eme jour de septembre dernier passé, et aussi par l'assiecte du taux et impost dudit aide, puet plus a plain apparoir, de laquelle some de III^M l. t. dessusdicte, nous nous tenons pour contente et bien payee, et en quittons ledit receveur et tous autres a qui quittance en puet et doit appartenir. Donné soubz nostre seel en tesmoing de ce, le XIIII^eme jour de decembre, l'an mil CCCC quarante et six.

Par madame la duchesse.