1442 (n. st.), 24 février. — Saumur (Château).

Yolande par la grace de Dieu royne de Jherusalem et de Sicile, duchesse d'Anjou, contesse de Provence, de Forcalquier, du Maine et de Pumont, a touz ceulz qui ses presentes lettres verront, salut.

Comme nostre amé et feal secretaire maistre Pierres Thovran nous ait par aucun temps servie ou fait de la recepte de toutes et chacunes nous finances en nous terres et seigneuries de Languedoc et de Provence, en quoy il ait fait telle deligence et prins de paines et travauls a nostre bien et proffit tellement que nous an devons louet et pour ce soyons derechief meue de lui baillier a certain temps l'administration de nosdites finances, esperans qu'il y continuera et fera de bien en mieulx,

Savoir faisons que nous, toujours bien singulierement confians de la loyaulté et proudomie de nostredit secretaire, icellui avons comis et institué, commettons et instituons de nouvel par cesdites presentes tresorier general de nosdites finances en nosdites terres et seigneuries de Languedoc et de Provence depuis le seizieme jour de juillet derrenier passé que Jehan Hardryn par avant nostre tresorier se descharga dudit office jusques au dernier jour d'octobre ensuivant inclus, et du premier jour de novembre ensuivant et dernier passé jusques a trois ans entiers et acomplis, (rature) lui ensuivant l'autres sans intervalle, et lui avons donné et donnons par cesdites presentes plaine puissance et auctorité de recevoir toutes et chescunes les finances a nous appartenans en nos terres et seigneuries de Provence et Languedoc et qui nous appartendront pour le temps advenir, soyent ordinaires ou extra ordinaires le proffit et revenu de la rue de Brancaue a nous appartenant par octroy de monseigneur le roy, nostre pension ordonné ou a ordonner pour recompense des greniers a sel de lunel et a lappordiers, les dons a nous faiz ou a faire par mondit seigneur le roy oudit païs de Languedoc et toutes autres finances quelxconques, de donner quitances, descharges et acquez des finances qu'il recevra lesquelles voulons estre vallables come les nostres, de contraindre et faire contraindre tous receveurs, clavaires et autres officiers de recept soit du temps passé ou cellui a venir, de monstrer et bailler leur estat au vray avec les deniers et reliqua en quoy ilz nos puent ou pourront estre tenus a cause de nosdites receptes et y proceder par toutes maneuvres deues et raisonnables ainsi qu'il est de coustume pour nous propres deptes, et generalement de faire en ladite administration a nostre bien et proffit tout ce que tresorier general raisonnablement puer et doit faire, laquelle adminsitration et recepte de nosdites finances par ledit temps nostredit secretaire sera tenu faire bien et loyaument, et en rendre compte et reliqua devant telles personnes que a ce faire vouldrons commettre et depputer, et de ce la caucione et pleige nostre amé et feal maistre d'ostel Bernard Gournault jusques a la some de sinq cens florins.

Si donnons en mandement par cesdites presentes a tous et chacuns noz officiers de recepte et autres a qui il pourra appartenir que a nostrdit tresorier obeissent et entendent chascun en droit foz es choses regardans ledit offices, prions lez officiers de mondit seigneur le roy et lez gens du conseil de nostredit filz le roy Sicile que a nostredit secretaire donnent conseil, confort et aide en toutes choses qui leur seront possibles.

En tesmoing de ce, nous avons fait mettre nostre seel a ces presentes.

Donné en nostre chastel de Saumur le xxiiii^e jour de fevrier l'an mil cuatrecens quarante et ung.

Par le royne, Bernart Gornault, Jehan du Pont et autres presens.