1431, 28 octobre. — Angers (Château).
Yolande, reine de Jérusalem et de Sicile, duchesse d'Anjou, etc., lieutenant général de son fils Louis III, en application du contrat de mariage entre sa fille Yolande et François, comte de Montfort et de Fougères, fils aîné du duc Jean V de Bretagne, cède et transporte à ce dernier et à son beau-fils François la terre de Chateaufromont1.
A. Original sur parchemin, jadis scellé sur double queue, endommagé. Nantes, Archives départementales Loire-Atlantique, E 10, no12 [original numérisé].
Yolant, par la grace de Dieu royne de Jherusalem et de Sicile, duchesse d'Anjou, contesse de Prouvence, de Forcalquier, du Maine et de Piemont, lieutenant general de nostre trés chier et trés amé ainsné filz, Loys, par icelle mesmes grace roy desdiz royaumes, duc et conte des duché et comtez dessusdiz, a touz ceulx qui ces presentes lettres verront, salut.
Comme par le traicté final du mariage nagueres fait et consommé entre noz trés chiers et trés amez enfens Françoys, conte de Montfort et de Fougeres, filz ainsné de nostre beau frere le duc de Bretaigne, et [Yolanta], nostre fille, contesse des contez dessusdiz, eust esté par nous, entre autres choses, promis et accordé bailler, ceder et transporter franchement et quictement (lacuna) frere et filz la chastellenie, appartenences et deppendences de Chasteaufromont pour le fait dudit mariage, pour en joïr a tousjours mais par herita[ge] (lacuna) eulx, et qui d'eulx aura cause en pur gaing de nopces, et soit ainsi que puis nagueres par noz conseillers lors estans a Nantes avons a nosdiz frere et fil[s] (lacuna) bailler et delivrer le contract de la vendicion de ladite chastellenie de Chasteaufromont a nous fecte par le seigneur de Bueil, auquel il appartenoit,
savoir faisons que nous, voulans enteriner et acomplir toutes et chascunes les choses par nous promises et accordees ou traicté dudit mariage selon la fourme et teneur du contract sur ce fait, avons aujourd'uy, de nostre certaine science, baillé, cedé et transporté, baillons, cedons et transportons par cesdites presentes a nosdiz frere et filz le duc de Bretaigne et le conte de Montfort sondit filz, touz tels drois, noms, raisons et accions que nous avons et povons avoir en ladite chastellenie, terre, appartenence et deppendence de Chasteaufromont, pour d'iceulx joïr par eulx et qui d'eulx aura cause a tousjours par heritaige, tout par la fourme et maniere plus a plain contenue ou contract dudit mariage,
de laquelle chastellenie, terres et appartenences nous sommes dessaisis et par cesdites presentes en vestons et saisissons nosdiz frere, filz, leurs heritiers, successeurs et qui d'eulx auront cause.
Et, en tesmoing de ce, nous avons fait mectre nostre seel a ces presentes.
Donné en nostre chastel d'Angiers, le xxviii jour d'octobre, l'an de grace mil quatre cens trente et un.
Par la royne en son conseil, les seigneurs de la Tour et de Martigue, le juge d'Anjou et autres presens.
(Signé :) Ritonis.
Yolant] lacuna.
Édition : Jean-Damien Généro .
Consulter la bibliographie — Afficher le XML source de l'acte — Afficher la version pdf de l'acte.