1429, 31 août. — Bourges.

Yoland, par la grace de Dieu royne de Jherusalem et de Sicile, duchesse d'Anjou et de Tourraine, contesse de Prouvence, de Fourcalquier, du Maine et de Pymont, ayant le gouvernement et administracion desdiz duchez et contez, pour et de par nostre tres chier et tres amé ainsné filz, Loys, par icelle mesme grace roy desdiz royaumes, duc et conte desdiz duchez et contez, a tous ceulx qui ces presentes lettres verront, salut.

Comme noz bien amez vailet et femme de chambre, Jehan Garreau et Jeannette, sa femme, nous ayent continuelment serviz par l'espace de vingt ans ou environ, qu'ils ont esté continuelment demourans avec nous, ausquelx, comme bien sommes recolent, promeismes, des le commancement de leur service, donnez de gaiges oultre toutes despenses, robbes, vestemens, livres et autres bienfaiz, la somme de soixante livres tournois de gaiges, de bonne monnoye lors courant, desqeulx gaiges, obtant noz autres affaires, ils n'ont eu aucune satisfacion, assignacion, ordonnance, ne paiement de tout le temps passé, combien qu'ilz ayent eu de nous aucuns autres bienfaiz,

savoir faisons que nous, considerans que a multiplicacion de service appartient croissance de louee, ayans en memoire les grans, loyaulx et bons services que lesdiz espoux nous ont faiz ou temps passé, a grans pauvres travailz, despences et perilz, sans rescompesacion condigne^a, font chacun jour continuelment, et esperons que de plus en plus feront ou temps a venir, et qu'ilz ont usé leur temps en nostre service, et que ledit Garreau estant en nostredit service se priella^b et bleca pieza d'un braz, dont il est impotent, desirans, pour l'acquit de nostre conscience, ne retenu leur service més le recongnoistre et les rememorer et pourveoir aucunement a partie de leur vie et estat au bien d'eulx et de leurs sucesseurs, et a l'exemple des autres, a iceulx Jehan Garreau et Jannette, sa femme, pour les causes dessusdites, et autres a ce nous mouvans, pour eulx, leurs hoirs, sucesseurs et ayans cause, avons donné et octroyé, donnons, baillons en paiement, cedons, laissons, transportons et octroyons de nostre certaine science et grace especial par ces presentes, par donacion et ottroy inrenocable, qui est ditte donnaison entre les vifs, se mestier est, la maison, hostel et lieu, vulgairment jadis appellé Sale Braudeuse, sis hors nostre ville d'Angiers, entre nostre chastel et l'eglise de Saint Lau, prés dudit lieu d'Angiers, avecques les jardins, terres et courtilz, autres maisons et appartenances dudit hostel, tant ce que lesdiz Garreau et Jeannette en tiennent a present par octroy de nous a eulx fait a leur vie, comme ce que autres en tiennent a viagé ou autrement, icelui viagé failli et leur en baillons des a present la pocession, saisine et seigneurie par ces^c noz lettres, et nous en deppossons du tout, lequel hostel que fist faire et ediffier maistre Robert Bonteuillain, avec les jardins et autres choses dessudites nous appartenoient par don et octroy de feu prince de glorieuse memoire, mon tres redoubté seigneur et espoux, dont Dieux ait l'ame, pour iceulx hostel et autres maisons, avec les jardrins, courtilz, terres, cours, cloustures et autres quelxconques appendances, appartenances et deppendances, avoir, tenir, possider et exploicter, en joïr et user, et en fere et disposer comme de leur propre chose a touz més^d, perpetuelment a heritaige, plainement et entierement par lesdiz Garreau et Jannette, leurs hoirs nez et a naistre, sucesseurs et aïans cause quelxconques, aux droiz et devoirs anciens et adcoustumez.

Si donnons en mandement expressement par ces mesmes presentes, a noz amez et feaulx les gens de noz comptes estans a Angiers, et a touz noz autres justiciers et officiers, et a leurs lieuxtenans, et a chacun d'eulx, que de nostre present don, bail, lais^e, transport, concession et octroy, facent, seuffrent et laissent, chacun en droit foy, lesdiz Jehan Garreau et Jannette, sa femme, leurs hoirs, sucesseurs et aïans cause, a touzjours més, perpetuelment a heritaige, joïr et user plainement et paisiblement, et en faire et disposer comme de leur propre chose, en obstant touz empeschemens que mis leur auroient esté au contraire, si aucuns en y avoit, non obstant quelxconques autres dons et bienfaiz que lesdiz espoux aient eu de nous ou temps passé, non exprimez en ces presentes, ou peussent avoir pour le temps a venir, constitucions de non alouer, ordonnance, restnoncemans, mandemens et deffences a ce contraires.

En tesmoing de ce, nous avons fait mestre nostre seel a ces presentes.

Donné a Bourges, le derrenier jour d'aoust, l'an de grace mil iiii^c vingt et neuf.

Par la royne, Jehan Porcher et autres presens^f.