1419 (n. st.), 18 janvier. — Angers (Château).
Yolande, reine de Jérusalem et de Sicile, duchesse d'Anjou, etc., ayant le gouvernement de ses enfants mineurs, confirme les gages annuels de Jean Porcher, son secrétaire et maître de sa chambre aux deniers, à hauteur de 212 livres 10 sous tournois, composés de 100 livres accordés par la duchesse et 112 livres 10 sous accordés par Louis II, et ce depuis le mois de septembre 1414, à prendre sur la recette de la Chambre, et mande aux gens des comptes à Angers d'allouer ces sommes aux comptes de Jean Porcher.
A. Original non retrouvé, signé par le secrétaire Jean Michel, scellé du sceau de secret.
B. Copie dans le compte de Jean Porchier, maître de la chambre aux deniers. Paris, Archives nationales de France, KK 243, f. 41 recto [copie numérisée].
Yoland, par la grace de Dieu royne de Jherusalem et de Sicile, duchesse d'Anjou, contesse de Prouvence, de Fourcalquier, du Maine et de Pimont, aïant le bail, garde, gouvernement et administracion de noz enffans miners d'ans et de leurs terres et seigneuries, a tous ceulx qui ces lettres verront, salut.
Comme japieça, ainsi que par noz autres lettres peut apparoir, nous ayons retenu, commis et institué nostre amé et feal secretaire, Jehan Porcher, en office de maistre de nostre chambre aux deniers, et, aprés ce, et comme par noz lettres est contenu, lui ayons ordonné avoir et prendre par chascun an des deniers de sa recepte la somme de cent livres tournois de gaiges, et, depuis ce, monseigneur, que Dieu pardoint, a nostre requeste et intercession, et pour consideracion des bons services que nostredit secretaire et maistrre de nostre chambre aux deniers faisoit continuelment a lui et a nous, mesmement pour lui aidier a mielx supporter les charges de son office, lui eust aussi ordonné avoir et prendre sur les deniers de sa recepte, par chascun an, la somme de cent douze livres dix solz tournois, ainsi que par lettres de monseigneur peut apparoir, et que nous mesmes avons bien memoire,
et il soit ainsi que, pour ce que es lettres de mondit seigneur n'est faicte mencion de ladite ordonnance de c livres tournois de gaiges par nous par avant faicte a nostredite secretaire, comme dit est, aucuns pourroient faire difficulté de lui accepter l'une et l'autre ordonnance sans autrement en savoir nostre voulenté,
savoir faisons que nostre voulenté est, et nostre plaisir, que nostedit secretaire et maistre de nostre chambre aux deniers ait, preigne et retiegne des deniers de sadite recepte par chascun an, depuis le mois de septembre mil cccc xiiii, dont presentement il rent son compte, jusques a present, et de cy en avant tant qu'il sera oudit office, lesdis ordonnances a lui faictes, tant par mondit seigneur que par nous, monte a la somme de iic xii l. x s. t. de gaiges par an.
Si donnons en mandement par ces presentes a noz amez et feaulx conseillers les gens de la chambre de noz comptes a Angiers, et autres a qui il appartendra, que, ladite somme de iic xii l. x s. t. de gaiges par an, ilz alouent es comptes de nostredit secretaire et maistre de nostre chambre aux deniers, Jehan Porcher, et rabatent de sa recepte, en rapportant ces presentes ou vidimus d'icelles, plainement et sans contredit, nonobstant quelxconques dons ou autre biens faiz de nostredit secretaire, ordonnances, mandemens ou deffences faictes ou a faire au contraire.
Donné en nostre chastel d'Angiers, soubz nostre seel secret, le xviiie jour de janvier, l'an de grace mil cccc dix huit.
Par la royne, present Jehan Dupuy, conseiller.
(Signé :) J. Michel.
Édition : Jean-Damien Généro .
Consulter la bibliographie — Afficher le XML source de l'acte — Afficher la version pdf de l'acte.