1461, 6 septembre. — Aix-en-Provence (Palais).
René, roi de Jérusalem et de Sicile, duc d'Anjou, etc., accorde un sauf-conduit à son conseiller Lamberto Grimaldi, seigneur de Monaco, et à six personnes de sa compagnie, qu'il envoie auprès du roi de France.
A. Original sur parchemin, signé par René et le secrétaire Jean de Charnières, avec visa de Johannes Bartholomei, juge-mage de Provence (visa per me Johannem Bartholomei, militem, iudicemque maiorem Provincie), exempté de droits de chancellerie (gratis pro consiliario), enregistré (registrata. Laureti). Monaco, Archives du Palais, Archives secrètes, A 21/4, no5.
a. Saige (Gustave), Documents historiques relatifs à la principauté de Monaco depuis le quinzième siècle, recueillis et publiés par ordre de S.A.S. le prince Charles III, 1, 1, Monaco, Imprimerie du gouvernement, 1888, p. 314-315, nocxxxiv.
René, par la grace de Dieu roy de Jerusalem et de Sicile, duc d'Anjou, per de France et duc de Bar, conte de Provence, de Forcalquier et de Piemont, a tous seneschaulx, baillifs, lieutenans, cappitaines de gens d'armes et de trait, gardes de bonnes villes, chasteaux, forteresses, bourgs et autres places, ponts, ports, peages, passaiges, tranverses et destroiz quelxconques, tant de nostre saint pere le pape, de monseigneur le roy et de nous, que autres nos amis, aliez et bienveillans, salut et dilection.
Comme nous envoyons presentement nostre amé et feal conseiller, Lambert de Grimault, seigneur de Monegues, par devers mondit seigneur le roy pour aucunes choses qui grandement touchent le bien, estat et honneur de mondit seigneur et de nous, nous vous requerons touz dessusdits, noz amis, aliez et bienveillans, que, ledit Lambert, nostre conseiller, et sa compaignie, jusques au nombre de six personnes, et autant de chevaulx, et au desoubs, armez ou desarmez, ensemble leurs robes, bouges, males, joyaulx, bahus, lettres, vaisselle, chacun de vous en droit soy laisse passer, sejourner, repasser, de jour et de nuyt, par eau et par terre, plainement, paisiblement, par lesdites villes, chasteaux, bourgs, passaiges, destroyz et lieux quelxconques, sans leurs faire ou donner, ou souffrir estre fait, mis ou donné, en corps ne en biens, aucun destourbier ou empeschement, ne pour ce leur faire paier peaige, tribut, ne autres redevances quelxconques, ainçois leur administrer vivres, guides et autres necessitez a leurs despens, si besoing en ont et ils vous en requierent.
Mandons et commandons a touz nos justiciers, officiers, vassaulx et subgitz, que le semblable veuillent faire sans aucun contredit ou difficulté, et tant en veuillez faire vous noz amis, aliez et bienveillans, comme vous en doyons savoir gré, et comme en pareil cas vouldriez que feissions faire pour les vostres, a quoy nous offrons de bon cuers, et vous, nos justiciers, que le fait de mondit seigneur le roy et de nous n'en soit retardé ou empesché, et que en doyez estre recommandé envers nous de bonne et vraye obeissance, ces presentes apres ung an non valables.
Donné dans notre palais d'Aix, le vie jour de septembre, l'an mil cccc soixante et ung.
(Signé :) René.
Par le roy, les evesques de Marseille et de Toulon presens.
(Signé :) J. de Charnieres.
Édition : Jean-Damien Généro .
Consulter la bibliographie — Afficher le XML source de l'acte — Afficher la version pdf de l'acte.