1443 (n. st.), 25 mars. — Toulouse.

René, par la grace de Dieu roy de Jherusalem et de Sicille, duc d'Anjou, de Bar et de Lorranne, conte de Provence, de Forcalquier et de Pymont, a noz juge, procureur, tresorier et receveur d'Anjou, et a tous nos autres justiciers et officiers, et a leurs lieuxtenans, salut.

Savoir faisons que aujourd'huy nostre amé et feal chevalier, conseiller et chambellan, Prigent de Couectivi, sire de Rays et de Champtocé, a cause de nostre amee cousine Marie de Rays, sa femme, nous a fait les foy et hommage lige qu'il nous devoit et estoit tenu faire oudit nom, a cause et pour raison des chastel, terre et seigneurie dudit lieu de Champtocé, tenyz de nous a ladite foy et hommaige au regarde de nostre chastel et ressort d'Angers, ausquelz foy et hommaige l'avons receu, sauf nostre droit et l'autrui.

Si vous mandons et commandons, et a chacun de vous, si comme a lui appartiendra, que, si pour cause desdiz foy et hommaige non faiz, lesdiz chastel, terre et seigneurie de Champtocé ou revenenues d'iceuxl auroient esté pour ce prins, saisiz ou aucunnement empeschez en nostre main, vous incontinent et sans delay, les daites mectre a plaine delivrance et remectre au premier estat et deu, sans lui fere metre ou donner ne souffrir estre fait, mis ou donné aucun empeschement au contraire.

Donné a Toulouse, le xxv^e jour de mars, l'an de grace mil iiii^c xlii.

Par le roy, les seigneur de Beauvau et de Pressigné, et maistre Clarambaut de Presy, avecques plusieurs autres presens^a.